Хэт даврагчдад цохилт өгөөд буцах үедээ Туркийн хил орчимд дайралтад өртөж, улмаар сүйрсэн ОХУ-ын байлдааны "Су 24” онгоцыг сөнөөх тушаалыг хэн өгсөн болохыг тогтоосон талаар "www.minval.az” мэдээллээ. Туркийн экс Ерөнхий сайд Ахмет Давутоглу уг тушаалыг өгсөн гэнэ.

"NTV” сувагт тэрбээр "Би Туркийн хилийг зөрчсөн бүх онгоцыг сөнөөх тушаал өгсөн. Гэхдээ зөвхөн ОХУ-ын онгоцуудыг сөнөөх тушаал өгөөгүй. Зөвхөн Туркийн агаарын хилийг зөрчсөн бүх онгоцыг сөнөөх тушаал гаргасан. Нэг улс руу чиглэсэн тушаал байгаагүй. ОХУ-ын онгоцууд манай улсын хилийг хэд хэдэн удаа зөрчиж байсан” гэж ярьжээ.

Энэ сарын эхээр "Су 24” сүйрсэн хэсэгт Туркийн Ерөнхийлөгч Эрдоган очиж, амиа алдсан нисгэгчийн гэр бүлээс уучлалт гуйж, нөхөн төлбөр өгөхөө мэдэгдсэн билээ. 

Б.Дэлгэрцэцэг