Энэ даваа гаригаас эхлэн аагим халуун өдрүүд үргэлжилж байна. Эл байдал баасан гариг хүртэл үргэлжилнэ гэдгийг УЦУОШГ-аас мэдээлж байна. Өдөртөө 35-37 хэм халж байгаа ч хөрсөн дээрээ бол 40 хэм хүрч байгаа нь үнэн гэв. Хэт халуун болж байгаагаас үүдэж Яаралтай түргэн тусламжийн төв болох 103-т ирэх дуудлага нэмэгдсэн байна. Учир нь бага насны хүүхдүүд наршиж, суулгалт өгөх, өндөр настай хүмүүсийн зүрх судас нь ачаалалаа дийлэхгүй даралт нь ихэссэн, жирэмсэн эхчүүд болон архи дарс хэтрүүлэн хэрэглэсэн гэх дуудлага ирж байна.

Жирийн өдрүүдээс хоёр дахин нэмэгдсэн байгаа аж. Ингээд тус байгууллагын чанарын албаны мэргэжилтэн Ц.Наранцэцэг "Хэт халуун өдрүүд үргэлжилж байгаатай холбоотойгоор манай төвд ирэх дуудлагын тоо харьцангуй ихэссэн. Манай төв 24 цагийн турш 900 гаруй дуудлага хүлээн авч, дуудлагын дагуу ажиллаж байна. Нийт дуудлагын 60-65 хувь нь зүрх судасны өвчлөл эзэлж байна.

Иргэд нарны хордлого гэхээсээ илүү ихэвчлэн шинж тэмдгүүдээр нь дуудлага өгдөг. Тэр дундаа даралт ихсэх, толгой эргэх, дотор муухай оргих зэрэг ерөнхий хордлогын шинж тэмдгүүд дийлэнх хувийг эзэлж байна. Сүүлийн өдрүүдэд 900 гаруй дуудлага ирж байна. Энэ нь нийт дуудлагын 10 хувь буюу 100-150 орчим иргэдийн дуудлагаар нэмэгдсэн. Тиймээс иргэд онц ажилгүй, гэрээсээ гарах шаардлагагүй бол өглөө 10-аас 16.00 цагийн хооронд гадуур гарахгүй байхыг зөвлөж байна. Хэрэв гадагш гарах шаардлагатай бол нарны малгай өмсч, нарны шүхэр хэрэглэж, шингэн юм сайн уух, нойтон алчуур толгой дээрээ тавьж явах хэрэгтэй” гэлээ.

Тиймээс ард иргэдээ энэ халуун өдрүүдэд бага насны хүүхдээ гадаа тоглуулахгүй байх, малгайг нь байнга норгож өмсгөж, шингэн ус сайн уулгаж наршилтаас сэргийлээрэй. Мөн түүнчлэн онцын шаардлага байхгүй бол гэрээсээ гарахгүй байхыг ч мөн зөвлөе. Хэрвээ наршилт хордлогын шинж тэмдэг илэрсэн тохиолдолд мэргэжлийн эмчээс зөвлөгөө авах юм байна шүү.

О.Сайхан