Зуны амралт дуусахад тун дөхсөн тул хүүхдийнхээ даалгаврыг зугаатай арга барилаар давтуулж байх хэрэгтэй.

• Дөнгөж уншиж сурсан хүүхдүүдэд ном унших хүндрэлтэй байдаг. Өөрөө уншаад сурчихсан хүүхэд унших зүйлээ өөрөө сонгог. Мэдээж унших ёстой номын жагсаалт бий. Гэхдээ хүүхэд сонирхолгүй бол шахаж шаардах хэрэггүй. Машины тухай сэтгүүл, хүүхдийн зохиол, ан амьтдын тухай ном байсан ч уншиж л байг. Хамгийн гол нь хүүхэд уншиж буй зүйлдээ дурлах нь чухал. Гол нь эцэг эхчүүд тэвчээртэйгээр хүүхдийнхээ сонирхлыг чиглүүлж, номонд дурлуулах хэрэгтэй.

• Сургууль хүүхдэд заасан болгон нь амьдрах ухаан болох нь чухал. Бодлого бодох, алдаагүй зөв  бичиж сурах, ажиглах зэрэг нь амьдралд өдөр бүр хэрэгтэй.  Жишээ нь, та хүүхдэдээ тухайн өдрийн болон долоо хоногт хийх зүйлийнхээ төлөвлөгөөг  бичүүлж болно. Тэгэхэд таны хүүхдийн бичих чадвар харагдаж бас хамтдаа хэчнээн их зүйл хийж болохыг харж болно. Амралт дуусахад хүүхдийн тань бичгийн хэлбэр сайжирч, алдаа гаргахаа багассан болохыг анзаарах болно.

• Эсвэл нэгэн сонирхолтой арга хэрэглэж болно. Хүүхдээрээ ойр дотныхондоо захиа бичүүлээрэй. Харин буцаагаад хариу бичиж байхыг хамаатнууддаа сануулаарай. Тэгвэл хүүхэд уншиж бичиж сурсан зүйлээ өөрөө ч анзааралгүй давтах болно. Дугтуйг нь бэлдээд, хаяг, огноог хэрхэн бөглөхийг заагаад өгөөрэй.

• Харин тооны хичээлийг бас нэг аргаар давтаж болох юм. Авах зүйлээ хүүхдээрээ бичүүлээд хамтдаа дэлгүүр явж байгаарай. Дараа нь зардлаа бичүүлээд тооцоо гаргуулж байхыг зөвлөж байна.
• Байгалийн ухааны хичээлийн зуны даалгаврыг хийх хамгийн сонирхолтой байдаг. Хүүхэд ихэвчлэн байгалийн үзэгдлийг ажиглаж, ургамал амьтны талаарх мэдлэг нь нэмэгдэж байдаг байна. Хүүхэдтэйгээ хамт ногоо тарьж, мод арчилж, жимс жимсгэнэ түүж, хортой хоргүй мөөгийг ялгаж сурахыг зааж өгөөрэй.

Хүүхдэд үнэхээр сонирхолтой байх болно. Мөн тэдэнд хөдөлгөөнт тоглоомууд зааж хамтдаа зугаацах хэрэгтэй.