Хоёр жилийн дотор нугасандаа гурван ч удаа мэс засал хийлгэсэн Америкийн алдарт гольфчин Тайгер Вүүдс энэ оны 10 дугаар сард их спортдоо эргэн ирэх бодолтой байна.

 

Тэрбээр Калифорнид 10 дугаар сарын 13-16, Турк улсад 11 дүгээр сарын 3-6, Багамын арлуудад 12 дугаар сарын 1-4-нд болох тэмцээнүүдэд оролцохоор төлөвлөж байгаа ажээ.

"Миний биеийн байдал аажмаар сайжирч, би өөрийн төлөвлөгөөг боловсруулж байгаа. Гэхдээ спортдоо эргэж ирэх үү, үгүй юү гэдэг нь бие маань цаашдаа хэрхэн тэнхрэхээс шалтгаална. Гэхдээ бүх зүйл сайн сайхан болно гэдэгт итгэж байна” гэж нэрт тамирчин ярьжээ.

Өдгөө 40 настай Вүүдс өнгөрсөн оны 2 дугаар сараас хойш тэмцээнд оролцоогүй юм. Тэрбээр 2015 оны 9 болон 10 дугаар сард мэдрэлийн судас дарагдсан гэх оноштойгоор хоёр удаа мэс засалд оржээ.

Тайгер Вүүдс дэлхийн хамгийн алдартай гольфчдын нэг бөгөөд "Мейжор” цуврал тэмцээнд 14 удаа түрүүлсэн үзүүлэлтээр хоёрдугаарт бичигддэг бол 18 түрүү авсан Жек Никлаус түүний өмнө ордог аж. Домогт Вүүдс 623 долоо хоногийн турш гольфчдын чансааг тэргүүлж байлаа.