Дотоодын татвар төлөгч компаниудад олон удаагийн виз олгох нь тэдний гадаад харилцаа, үйл ажиллагааг дэмжих ач холбогдолтой гэж Гадаад харилцааны яам үзэж байна.

Гадаад харилцааны сайд Ц.Мөнх-Оргил БНСУ-д ажлын айлчлал хийх үеэр хоёр улсын иргэд харилцан зорчих нөхцлийг хөнгөвчлөх асуудлыг дэс дараатай шийдвэрлэх, хүмүүнлэгийн шугамаар зорчих болон оюутан, бизнес эрхлэгчдэд виз олгох нөхцлийг хөнгөвчлөх санал тавьсан байдаг. Үүнийг ажил хэрэг болгохоор Гадаад харилцааны яамны Төрийн нарийн бичгийн дарга Д.Даваасүрэн БНСУ-аас Монгол Улсад суугаа Элчин сайд У Сунг урьж уулзжээ. Уулзалтаар хоёр орны иргэд харилцан зорчих нөхцлийг шат дараалан хөнгөвчлөх, ирээдүйд харилцан визгүй зорчих боломжийг судалж үзэх саналыг Солонгосын Элчин сайдад тавьсан байна. Ингэхдээ жилдээ 500 сая төгрөгөөс дээш татвар төлдөг Монголын аж ахуйн нэгжийн удирдлага, ажилтнуудад олон удаагийн виз олгуулж байхыг хүссэн ноот гардуулжээ.