Швейцарийн Цюрих хот дахь лалын шашинтнуудын төвд гал нээсэн этгээд 24 настай швейцарь хүн байсан гэдгийг тус улсын цагдаагийн газар тогтоосон байна. Гэмт этгээд халдлагын дараа амиа хөнөөжээ.

Даваа гарагт гарсан халдлагын үеэр зэвсэгт этгээд 3 хүнийг шархдуулсан байна.

Халдлага үйлдсэн этгээдийн цогцсыг хэрэг болсон газраас холгүй орших гүүрний дороос олсон гэж цагдаагийн газар мэдэгдсэн боловч ямар зорилгоор уг халдлагыг үйлдсэн байж болох талаар мэдээлэл өгсөнгүй.

Зэвсэгт этгээд лалын шашны төвд нэвтрэн орж, тэнд байсан хүмүүст хандан Швейцариас гарч явахыг шаардан хашгирч байсан гэж нэгэн гэрч ярьжээ. Тухайн үед хэргийн газарт байсан хүмүүсийн дунд Хойд Африкаас ирсэн цагаачид байсан байна.

Швейцарьт лалын шашинтнуудыг ад үзэх хандлага газар авч байгаа энэ үед дээрх хэрэг гарчээ.