Монгол банкны захирлуудын зөвлөл энэ сарын 05-нд хуралдаж, БНХАУ-ын Аж үйлдвэр, худалдааны банк /Industrial and Commercial Bank of China/буюу ICBC банкинд Улаанбаатар хотод төлөөлөгчийн газар байгуулах зөвшөөрлийг олгохоор шийдвэрлэлээ. Манай улсын өнөөгийн мөрдөж байгаа банкны тухай хуулиар гадаадын банк Монгол банкны зөвшөөрөлтэйгээр төлөөлөгчийн газар байгуулж, үйл ажиллагаа явуулах эрхтэй. Одоогоор Хятадын "Bank of China” Улаанбаатар хотод төлөөлөгчийн газраа байгуулаад гурван жил болж байна. ICBC банк нь БНХАУ-даа эрэмбээрээ "Bank of china”-ийн өмнө ордог бөгөөд манай улсад төлөөлөгчийн газраа нээх хүсэлтийг 2015 онд ирүүлж байжээ.

Мөн ICBC 2013 онд дэлхийн шилдэг 1000 банкийг тэргүүлж байсан. Нийт актив, үйл ажиллагааны цар хүрээгээрээ БНХАУ-даа нэгдүгээрт эрэмбэлэгддэг энэ банк дэлхийн улс орнуудад 1500 гаруй салбартай.

УИХ-ын гишүүн С.Жавхлан тэргүүтэй нэр бүхий гишүүд Гадаад хөрөнгө оруулалтын банкны тухай хуулийн төслийг УИХ-д өргөн барьсан. Төсөлд зааснаар гадаадын банк Монгол улсын санхүүгийн зах зээлд салбар нээн ажиллуулж, үйл ажиллагаа явуулахын тулд 1-ээс доошгүй жил төлөөлөгчийн газар ажиллуулсан байх шаардлагатай. Өөрөөр хэлбэл Төлөөлөгчийн газраа нээсэн банк салбар байгуулах эрхтэй болно.