Сөрөг хүчин болох МАН-ын зүрхэнд шар ус хурууллаа хэмээн Н.Алтанхуяг тун додигор. Эртний өст мэргэдийг Хэрэйдийн Тоорилын тусламжтайгаар дарахаар явж буй Тэмүүжин л ийм байсан биз хэмээн тэр баясан суугаа.

Харин Сөүлээс ирсэн Тоорил давхар давхар угсраа цохилтуудынхаа эхнийхийг ажил хэрэг болгосондоо тун тааламжтай яваа нь тодорхой. Н.Алтанхуяг, Н.Энхбаяр хоёрын байгуулах гэрээ аль наадмын дараагаас эхлэн олны сонорыг мялааж ирсэн ч ийнхүү нэг өдөр биелчих юм хэмээн Ардчилсан намын олон гишүүд, зүтгэлтнүүд бодож байгаагүй бизээ.

АН болон МАХН-МҮАН-ын "Шударга ёс эвсэл" хамтран засаглаж байгаа биш үү, тэгтлээ эмзэглэх, өөрчлөгдөөд байх юу байна хэмээн зарим нь мунхаглаж мэднэ. Тэгвэл Н.Энхбаяр, Н.Алтанхуяг нарын үзэглэсэн гэрээ энэ хоёр намыг арваад жил нэг хөнжилд оруулж ялсан ч ялагдсан ч бүх зүйлд намын үнэт зүйл нэг болж цус ойртохын эхлэл юм.

Энэ гэрээг хийхэд МАХН хэмээх намын эзэн хаан болсон Н.Энхбаярын хувьд асуудал байхгүй. Харин Н.Алтанхуягийн хувьд намын гишүүд байтугай Үндэсний зөвлөлдөх хорооны гишүүдтэйгээ ч ярилцаж зөвлөлдөлгүй ийнхүү цөөн хэдэн нөхдийн хамтаар Энхбаярын хөнжилд намаа дагуулан шургалсан нь олон хүний зэвүүцлийг хүргэж эхэлжээ.

Ердөө урд өдөр нь л МАН-ын гишүүдтэй хамтран Ерөнхий сайдыг огцруулах бичигт гарын үсэг зурж эсэргүүнээр тодорсон Ж.Батзандан өнөөдөр болзошгүй аюулыг урьдчилж харсан АН-ын цорын ганц гишүүн болж олны талархлыг хүлээж эхэлжээ.

УИХ-ын гишүүн М.Зоригт "Намын гишүүдээрээ нэг ярьж болмоор. Үүнийг нь мэдсэн бол Ж.Батзандантай нийлж зурдаг байж” хэмээн үзэл бодлоо илэрхийлсэн ба түүний араас АН-ын олон гишүүн Н.Алтанхуягийг шүүмжилж эхэлжээ.

Ер нь ч ард түмэн нэг хүний гэр бүлийн удирдлагад байдаг, З.Баянсэлэнгэ, О.Баасанхүү, Д.Тэрбишдагва, Н.Удвал, Э.Эрдэнэжамьян нарын олон янзын эрх ашгийн төлөө нийлсэн эрээвэр хураавар нөхдийн толгойг эрхлүүлж Засагт тарвалзуулж яв гэж Ардчилсан намыг сонгоогүй нь лавтай.

Н.Энхбаярын гарт орсон МАН яалаа, намаа хувааж тасдаж байж яаж саллаа, одоо АН-ын ээлж ирлээ гэх хүмүүс ч олон байна. Н.Энхбаярын төлөвлөгөө бол мэдээж МАН-ын чөмгийг таших. Чөмгөө ташуулсан МАН-ыг уландаа гишгэсэн Н.Энхбаярын санаа ханаж цадах уу гэдэгт хариулт өгч чадах хүмүүс Ардчилсан намд л бий.

Харамсалтай нь Н.Энхбаярын хэн бэ гэдгийг маш сайн мэдэх АН-ын үнэт зүйлсийн нэг шахуу болсон Р.Гончигдорж гишүүн Н.Алтанхуягийн нурууг хамгаалж зогсоод л гэрээ зурагдахыг харж байх юм.

Тэднийг нэгтгэж буй өөр том зорилго бол арав гаруй жил засгийн эрхэнд хамтдаа тарвалзах явдал. "Самбар"-ын Энхбаярын үе эргэн ирнэ л гэсэн үг. Гэхдээ тэр самбарт жаахан зай үлдээж Н.Алтанхуяг зэрэгцэх гэсэн байх л даа.

Юун нөгөө Ардчилсан намын авлигын эсрэг тэмцэх. АТГ үүдийг нь тогшихоос арай л наагуурхан байх болсон Н.Алтанхуягт авлигын загалмайлсан эцэг гэгдэх нэгэн л авралын од болж харагдаа юу гэлтэй.

Үлгэрлэвээс тэд хамтдаа авлигын эсрэг тэмцэх бололтой.

Н.Энхбаяр зүгээр нэг ирэхгүй ээ гэж олон хүн хэлж байсан. Баабарын амнаас "Н.Энхбаяр 2017 онд Ардчилсан намаас Ерөнхийлөгчийн сонгуульд нэр дэвшихийг үзээд л үхэх юмсан" гэсэн үг зүгээр ч нэг унаагүй болов уу.

Ардчилсан намын үе үеийн улстөрчид, гишүүд дэмжигчид олон жилийн турш Н.Энхбаярын эсрэг тэмцэхдээ Н.Алтанхуягийн үед нэг хөнжилд орох юм гэж зүүдлээ ч үгүй явсан нь лавтай.

Цухасхан сануулваас 1998 онд Үндсэн хуульд нэмэлт өөрчлөлт оруулж, УИХ-ын гишүүн Засгийн газрын гишүүн байж болох заалтыг хуульчилснаар парламентаас гадуур байгуулагдсан М.Энхсайханы Засгийн газрыг бүрэн бүрэлдэхүүнээр нь огцруулж, дараа нь Ц.Элбэгдорж, Ж.Наранцацралтын танхимыг ч унагаж байв. Н.Энхбаярыг улстөрчийнх нь карьерт АН-аас Ц.Элбэгдорж л хоёр удаа өвдөг шороодуулж байв. Тэгвэл энэ бүх явдал Ерөнхийлөгчийн эзгүйд болж өнгөрсөн нь ч сонирхол татам.

Х.Цахилгаан

 

http://www.bataar.mn/10028123