2015.06.25: BBC-ээс хоёр жил тутамд зохион байгуулдаг дуурийн дуулаачдын Cardiff Singer of the World наадмын шилдгүүд шалгарахад манай улсаас оролцсон дуучин, МУГЖ Э.Амартүвшин тус наадмын шилдэг тавд шалгарсан төдийгүй "Үзэгчдийн нэрэмжит шагнал” /Audience Prize/ хүртсэн билээ. Түүнийг эх орондоо ирэхэд монголчууд "Дэлхийн дуучин” ирлээ хэмээн хүндэтгэн угтан авсан. Түүнийг Дуурь бүжгийн эрдмийн театрын захиргаа, уран сайхны зөвлөлийн удирдагч болон гоцлол дуучид, түүний гэр бүлийнхэн "Чингис хаан” нисэх онгоцны буудал дээр угтан авсан юм. Дашрамд дурьдахад, Их Британийн BBC агентлагаас зохион байгуулсан "Cardiff Singer of the World” наадмын тэргүүн байрын эзнээр Беларуссийн дуурийн гоцлол дуучин Надежда Кучер шалгарсан юм. Наадмын эцсийн шатны шалгаруулалт зургадугаар сарын 21-ний ням гарагт Ст.Дэвидс Холлд болсон билээ. 



2015.07.02: Монголын сонгодог урлагт дахин нэг түүхэн хуудсыг шинээр мөнхөллөө. Энэ бол дөрвөн жил тутамд нэг удаа болдог суут хөгжмийн зохиолч П.И.Чайковскийн нэрэмжит дуурийн дуучдын олон улсын уралдаанд МУГЖ Г.Ариунбаатар түрүүллээ. Урлагийн олимп гэгддэг уг уралдаанд 39 орны 500-гаад уран бүтээлч видео илгээснээс эрэгтэй гоцлол дууны төрөлд 40 дуучин тэнцсэн. Улмаар уралдаан дөрвөн үе шаттайгаар явагдаж эцсийн шатанд үлдсэн дөрвөн дуучны нэгээр Г.Ариунбаатар шалгарсан юм. Харин эцсийн шатны шалгаруулалт өнгөрсөн шөнө Гала тоглолт хэлбэрээр явагдаж анх удаа эх орноо төлөөлөн оролцож байгаа МУГЖ Г.Ариунбаатар "Тэргүүн байр”, "Алтан медаль” хүртсэн байна. Тэрбээр энэхүү баярт үйл явдлаа хуваалцан "Би маш их баяртай байна. Та нартаа баярлалаа. Энэ уралдаан намайг хамгийн их сорилоо. Үнэхээр хvнд байлаа. Гэхдээ би ард нь гарсан. Тийм ээ, би урлагийн олимп гэгддэг П.И.Чайковскийн уралдаанаас анх удаагаа эх орондоо Тэргүүн байр, Алтан медалтай очихнээ. Аав ээж, элгэн садан, эрдэмтэн багш найз нөхөд анддаа болон бүгдэд нь баярлалаа. Аливаа тэмцээн уралдаанд оролцход нэн чухал асуудал бол мөнгө санхүү. Намайг чинь сэтгэлээсээ ойлгож байнга туслаж дэмждэг аварга А.Сүхбат ахдаа, "Эх нутгийн иргэн” ТББ тэргүүн УИХ-ын дэд дарга, М.Энхболд ахдаа мөн CMS group-ийн хамт олондоо, Монголын Цагдаагийн нийт бие бүрэлдхүүндээ, Улан-Удэ театрыхандаа дахин дахин талархаж байна.” хэмээн цахим хуудаснаа нийтэлсэн байв.  Энэхүү уралдаанд манай улсын таван уран бүтээлч эх орноо төлөөлөн оролцсон бөгөөд дуурийн гоцлол дуучин Б.Батжаргал, Ч.Энхтайван, Ч.Бадрал, н.Оюунчимэг, Г.Ариунбаатар нар оролцсон юм.


 "Бодлын хулгайч”, "Дэв”, "Миний хөрш чөтгөр”, "Эх орон дуудаж байна”  зэрэг уран бүтээлээр нь зургийн найруулагч Д.Ангарагийг бид сайн мэдэх болсон. Тэрбээр  2013 онд  Оскарын шагнал гардуулах ёслолд Монголоос анх удаа уригдаж бүх арга хэмжээнд нь оролцож байсан нэгэн. Мөн тэрбээр Америкийн кино зураглаачдын холбооноос зохион байгуулагддаг  "Америкийн шилдэг кино зураглаач” шалгаруулах ёслол буюу  "29th ASC Annual Awards” ёслолын бүх арга хэмжээнд өөрийн гэр бүлийн хамтаар оролцоод ирсэн.  Эл ёслолд дэлхийн алдартай кино зураглаачид, найруулагчид, жүжигчид, дуучид, хүндэт зочид, шагналд нэр дэвшигчид, ивээн тэтгэгчид болон "Universal Studios”, "Warner Bros”, "Paramount Pictures”, "Sony pictures” кино түгээгч компаниудын төлөөлөгчид зэргээс бүрдэх 1600 дэлхийн алдартай уран бүтээлчид оролцдогоороо нэр хүнд нь илэрхийлэгддэг билээ. Холливуд төдийгүй дэлхийн алдартай уран бүтээлчидтэй мөр зэрэгцэн эх орноо төлөөлж буй зураглаач Д.Ангараг тун удахгүй Пост продакшн хийхээр Америкийн E film гэдэг компанитай хамтарч ажиллахаар болсон гэнэ билээ. Тэрбээр "Үүнд трэйлер, хадмал орчуулга, өнгө засвар, аудио миксинг, дистрибьютер хувилбаруудыг гаргаж ажил орж байгаа. Дөнгөж сая тэднийхээс ирсэн и-мэйл уншаад сууж байлаа. Энэ кино 2016 онд гарах тухай imdb.com дээр "Golden treasure” нэрээр гарсан. Ер нь киногоо дотоод биш гадаад зах зээл уруу гаргах боломжийг эрэлхийлсэн эхний гэрээ хэлцлүүдийг эхлүүлээд байна” хэмээсэн юм.