Хүний нэрийг сайхан маазруулж наадам наргианы хэрэглүүр болгож болдгийн жишээ олон бий. Тухайлбал, УИХ-ын гишүүн байсан Г.Занданшатарын нэрийг онгон даам гэж маазруулдаг. Сү.Батболдыг ерөнхий сайд байхдаа Японд айлчлах үеэр нь дагалдаж явсан сайд дарга нар нь хооллож суухдаа яг энэ тухай ярьж нэгнийгээ явуулж байжээ. Г.Занданшатар нь үүнд хариу мэх сэтгэж С.Ламбаа сайдад "Таныг Хуврагшээ гэмээр юм биш үү?” хэмээн олноор хөхрөлдөж байхыг ерөнхий сайд нь тээр тэндээс сонсоод "Ёстой журамтай газар баас шээс ярьж намба алдлаа” хэмээн уурласан гэдэг. Энэ сэдвийг үргэлжлүүлэхэд, Монголын радиогийн даргаар олон жил ажилласан сэтгүүлч Б.Пүрэвдаш, МОНЦАМЭ агентлагийн дарга байсан сэтгүүлч Т.Баасансүрэн нар дотнын найзууд юмсанжээ. Пүүжээ нь Баасангаа утсаар залгахаар хэргээр "Хэн бэ?” гэдэг байжээ. Т.Баасансүрэн гуай бие биенээ дууддаг нэрээрээ "Баасан” гэлгүй яахав. Тэгэхээр нь угийн шооч Пүүжээ нь "Яасаан?” гэдэг байж. Ямар учиртай ингэж асууж байгааг нь ухаж мэдээгүй найз нь "Баасан байна аа” гэхээр өөдөөс нь мөн л "Яасан гэнэ ээ?” гэдэг байна. Төдийд л учрыг нь ухсан Баасан найз нь түсхийтэл хөхрөөд хоёул нийлж хөгжилддөг байсан нь олоон жилийн өмнөх явдал гэнэ ээ. Дашрамд дурьдахад нэртэй холбоотой нэг айхтар онигоо байдаг нь "Хамгийн муухай нэр бол Цэрэндалай”. 

Л.Ган