ОХУ Арктикт  хийсэн геологи хайгуулын ажлынхаа дүнд Хойд мөсөн далай орчмын хилээ цаашлуулж 1,2 сая хавтгай дөрвөлжин км нутгийг өөртөө нэгтгэх гэнэ. Энэ талаарх өргөдлөө НҮБ-д ирэх 2015 оны хавар өгна гэдгээ Санкт-Петербург хотноо болсон эрдэм шинжилгээ, судалгааны "Академик Федоров” хөлгийг угтах ёслолын үеэр ОХУ-ын Байгаль орчин, байгалийн нөөцийн сайд Сергей Донской мэдэгджээ.
ТАСС агентлагийн сурвалжлагчийн асуултад хариулахдаа Сергей Донской сайд "Ингэснээр нүүрс ус төрөгчийн 5 тэрбум тоннын нөөц биднийх болно. Энэ бол хамгийн багаар бодоход шүү дээ. Энэ нөөц нэмэгдэнэ гэдэгт би итгэлтэй байна” гэжээ.