Мэдээлэл технологийн практик ур чадварын олон улсын ТОПСИТ шалгалтыг Засгийн газрын тохируулагч агентлаг Харилцаа холбоо, мэдээллийн технологийн газар /ХХМТГ/ нь Мэдээллийн технологийн үндэсний парк /МТҮП/ болон БНСУ-ын Мэдээлэл, харилцаа холбооны технологийг дэлгэрүүлэх институци /МХХТДИ/-тэй хамтран Монгол Улсад нутагшуулах ажлыг хийж ирсэн билээ.

Тэгвэл энэ ажлын хүрээнд Мэдээлэл, харилцаа холбооны салбарыг хөгжүүлэхэд нэн шаардлагатай боловсон хүчнийг бэлтгэхэд дэмжлэг болох нийт иргэдийн мэдээллийн технологийн мэдлэгийг үнэлэх боломжтой энэхүү олон улсын ТОПСИТ шалгалтыг албан ёсоор Монголд өнөөдрөөс эхлэн авахаар нээлтээ хийлээ. Ийнхүү энэ шалгалтыг манайд албан ёсоор авч байхаар болж байна гэсэн үг юм.

Нээлтийн үйл ажиллагаанд ХХМТГ-ын дарга Б.Чинбат тэргүүтэй удирдлагууд, МТҮП-ын захирал Ц.Содномдамба, БНСУ-ын МХХТДИ-ийн Ерөнхийлөгч Др.Сан Хо Лий, дэд ерөнхийлөгч Др.Шим Жан Суп нар оролцлоо.

Энэ шалгалтын онцлог нь юу вэ гэхээр, мэдээллийн технологийн чиглэлээр сурч байгаа оюутан, энэ салбарт ажиллаж байгаа албан хаагч болон програм хангамж хөгжүүлэгчдийн ажлын талбарт шаардлагатай байгаа програм хангамж, өгөгдлийн сан, мэдээллийн сан, мэдээллийн аюулгүй байдал, мэдээллийн технологийн бизнес, технологийн харилцан холболт, төслийн удирдлага зэрэг чиглэлүүдийн мэдлэг, практикийн ур чадварыг үнэлэх зорилготой гүйцэтгэлийн үнэлгээний шалгалт юм.

Тус шалгалтыг өнөөгийн байдлаар Филлиппин, Вьетнам, АНУ, Тайланд зэрэг улсад албан ёсоор авдаг ба шалгалтын хэлбэр нь зургаан түвшинтэй, компьютерт суурилсан, технологийн болон бизнесийн гэсэн хоёр бүлэг бүхий нийт 65 тестийн асуултуудаас бүрддэг юм байна.

ТОПСИТ шалгалтын хураамжийг 100 хувь чөлөөллөө

Мэдээлэл технологийн үндэсний паркийн захирал Ц.Содномдамба:

"БНСУ-аас ТОПСИТ шалгалтын системийг Монголд нэвтрүүлэх эрхийг олгосноор манайх анхны шалгалтаа өнөөдөр маргааш гээд хоёр өдөр зохион байгуулах гэж байна. Үүнийг нэвтрүүлэхээр Харилцаа холбоо, мэдээллийн технологийн газар, БНСУ-ын Мэдээллийн технологийг дэлгэрүүлэх институци хоорондын 2015 онд зурсан харилцан ойлголцлын "Санамж бичиг” ийнхүү биелэлээ олсонд баяртай байна. Өөрөөр хэлбэл, дэлхийд хүлээн зөвшөөрөгдсөн мэдээллийн технологийн чиглэлийн олон улсын шалгалтын 3 дахь эрх Монголд баталгаажиж байгаа юм. Энэ шалгалтын бэлтгэл ажлын хүрээнд манай байгууллага өнгөрсөн жил МТШХХГ-тай хамтран МУИС, ШУТИС, "Хүрээ”, "МХТДС”, "Их засаг” ОУИС-ийн оюутан, мэдээллийн технологийн инкубаторт бойжиж буй компаниудын програм хөгжүүлэгч ажилтан, алба хаагч нарыг хамруулан хоёр удаа туршилтын сорилго шалгалтыг амжилттай зохион байгуулсан. Дэлхийд танигдсан ТОПСИТ буюу Мэдээллийн технологийн практикийн ур чадварын 2017 оны хаврын анхны шалгалтанд мэдээллийн технологийн салбарт ажиллаж буй инженер, техникийн ажилчид, програм хангамж хөгжүүлэгч залуус та бүхэн хамрагдснаар дэлхийн хэмжээнд ур чадвараа сорьж, олон улсын түвшинд мэдлэгээ тодорхойлохоос гадна шалгалтын "анхдагч” гэдгээрээ илүү давуу талтай. Анх удаагаа Монголд зохион байгуулж байгаа гэдэг үүднээс шалгалтын бүртгэлийн хураамжийг энэ удаа эрх бүхий байгууллагаас 100 хувь чөлөөллөө” гэв.

БНСУ-ын МХХТДИ-ийн Ерөнхийлөгч Др.Сан Хо Лий

"IT-гийн салбарын боловсон хүчнийг дэлхийн тавцанд гаргахын тулд дэлхийн түвшинд хүлээн зөвшөөрөгдсөн шалгалтын систем, стандарт, түвшин хэрэгтэй байсан учраас Солонгост ТОПСИТ гэх энэ шалгалтыг үүсгэн байгуулсан юм. Тэгэхээр энэ шалгалтаар дамжуулан Монгол Солонгос хоёр улсын хоорондын харилцаа улам батжина хэмээн найдаж байна. Монгол Улсын IT-гийн салбарын боловсон хүчнүүд маань зөвхөн Монголдоо биш дэлхийн олон улсад үнэлэгдэж, хүлээн зөвшөөрөгдөх үйл ажиллагааг нээж байгаа шалгалтын систем гэдгээрээ ихээхэн онцлогтой юмаа” гэв.

Өнөөдөр ТОПСИТ шалгалтыг 90 хүн өгнө

ТОПСИТ-ын туршилтын шалгалт нь 2016 онд хоёр удаа авагдсан бөгөөд өнөөдрийн авч байгаа шалгалт нь албан ёсных гэдгээрээ их онцлогтой. Өнөөдөр маргааш хоёр өдөр явагдана. Одоогоор 90 хүн бүртгүүлсэн байна. Өдөр 13.00 цагт энэ танхимд шалгалт компьютер дээр англи хэлээр авагдах юм ажээ. Энэ шалгалт жил болгон тогтмол явагдана.

Ийнхүү тус бүрийн онцлогтой шалгалтыг нэвтрүүлснээр бүх нийтийн мэдээллийн технологийн суурь мэдлэг, төрийн албан хаагчдын ур чадварыг тодорхойлох үнэлэх олон улсын шалгалтын цогц системийг бүрдүүлж чадлаа гэж хэлж, ойлгож болно.