УИХ-ын нэр бүхий гишүүнд хүчиндүүлсэн эмэгтэй хэвтэн эмчлүүлж байна
Энэ сарын 12-ны өдөр буюу өнгөрсөн долоо хоногийн даваа гаригийн 9 цагийн орчимд Н гэгч бүсгүй "Нэр бүхий УИХ-ын гишүүн /бид тухайн гишүүний нэрийг нууцлав/-д хүчиндүүллээ” хэмээн Баянзүрх дүүргийн Цагдаагийн 1-р хэлтэст гомдол гаргасан талаар бид мэдээлсэн. Н бүсгүйн гомдлыг тус хэлтэсийн н.Түвшинжаргал гэх байцаагч шалгаж байсан ч удалгүй хошууч н.Батдэлгэр гэх байцаагч шалгаж эхэлсэн байдаг.
Бид энэ асуудлаар нэр бүхий гишүүнтэй холбогдож тодруулахаар хэд хэдэн удаа залгаж, мессэж явуулсан боловч хариу өгөөгүй. Харин түүний ойрын эх сурвалж хэлэхдээ, Н гэх эмэгтэй хувийн шалтгааны улмаас цагдаагийн байгууллагад гомдол гаргасан юм шиг байна лээ гэх хариулт өгсөн юм. Энэ нь УИХ-ын нэр бүхий гишүүнтэй холбоотой гомдол цагдаагийн байгууллагад шалгагдаж буйг нотлож буй юм.
Энэхүү хэргийн холбогдох нотлох баримтуудыг шинжлүүлэхээр Шүүх шинжилгээний үндэсний хүрээлэнд хүргүүлсэн гэх мэдээлэл байна. Одоогоор хохирогч Н бүсгүй нэр бүхий эмнэлэгт хэвтэн эмчлүүлж байгаа гэсэн мэдээлэл бидэнд ирлээ. Мөн УИХ-ын гишүүн, түүний найз нөхдийн зүгээс хохирогчид мөнгө өгөхийг завдах, гомдлоо татаж, цагдаагийн байгууллагад өгсөн эхний мэдүүлгээ өөрчлөхийг гуйж байгаа аж. Энэхүү хэргийн мэдээллийг холбогдох байгууллагууд нилээдгүй нууцалсан хэвээр байна.
Б.ЦЭЛМЭГ