Дархан-Уул аймгийн Төмөрлөгийн үйлдвэрийн Зуухны цехийн 20 ажилтан угаартжээ. Өчигдөр 15.00 цагийн үеэс эхлэн ажилчид угаартсан байж болзошгүй байдал илэрч, эхний хүнийг эмнэлэгт хүргэсэн аж.

Тэгвэл өнөөдөр өглөөний 08.00 цагийн байдлаар яг адил шинж тэмдэг илэрсэн 20 хүн аймгийн нэгдсэн эмнэлэгт хэвтэн, эмчлүүлж байгаа гэнэ.

Эрүүл мэндийн яамны эх сурвалжийн ярьснаар тэдний 18-ынх нь биеийн байдал дунд зэрэг, хоёрынх нь бие хүндэвтэр байна. Угаартсан 20 ажилчин 25-55 насны хүмүүс ажээ.

Төмөрлөгийн үйлдвэрийн Зуухны цехэд 40 гаруй хүн ажилладаг байна. Үйлдвэрийн ажилчид олноороо угаартсан ослыг зуухны цехэд нүүрстөрөгчийн хэт исэл явагдсан байж болзошгүй гэж таамаглаж байгаа талаар Эрүүл мэндийн яамны Тандалт, шуурхай удирдлагын хэлтсээс мэдээллээ.

Тус хэлтсийн ажилчид Дархан-Уул аймгийн нэгдсэн эмнэлэгтэй цахимаар холбогдож, нөхцөл байдалтай танилцан, мэргэжлийн зөвлөгөө өгч эхэлжээ.

Төмөрлөгийн үйлдвэрийн зуухны цехэд Дархан-Уул аймгийн Эрүүл мэндийн газар Нэгдсэн эмнэлэг, Мэргэжлийн хяналт, Онцгой байдлын мэргэжилтнүүд ослын шалтгааныг тогтоохоор ажиллаж байгаа ажээ.