Улаанбаатараас Увс аймгийн чиглэлд зорчиж явсан хот хоорондын зорчигч тээврийн "ПАЗ 4234” загварын автобус Архангай аймгийн нутагт энэ сарын 8-9 нд шилжих шөнө осолдсон юм. Автобусанд нийт 34 хүн зорчиж явсан тухай цагдаагийнхан мэдээлж байсан. Гэтэл өчигдөр Автотээврийн үндэсний төвөөс жолоочтой нийлээд 39 хүн байсан гэв. Одоогоор Архангай аймгийн нэгдсэн эмнэлэгт 13 хүн эмчлүүлж байгаа ажээ. Эмчлүүлж буй иргэдийн гэмтлийн зэрэг тодорхойгүй байна. Ослын талаар Авто тээврийн үндэсний төвийн Тээвэр, хөрөнгө оруулалт хариуцсан дэд захирал Д.Батбаатар ярихдаа "Өчигдөр /уржигдар/ 04:30 цагийн үед манай орон нутагт явсан автобусны хяналтын GPS Архангай аймагт унтарсан. Тухайн үед яаралтай арга хэмжээ авч, асуудлыг тодруулахаар Архангай аймгийн Авто тээврийн төвөөс мэргэжилтэн гарган ажиллуулсны дүнд осолдсон тухай мэдээ ирсэн. Тус аймгийн Авто тээврийн газраас автомашин гарган зорчигчдыг Увс руу тээвэрлэхээр болсон. Хэрвээ зорчигчид ямар нэг асуудалгүй, Увс руу шууд явмаар байна гэвэл тэдгээр зорчигчийг тээвэрлэж байгаа. Ослын шалтгааныг эцэслэн тогтоогоогүй. Урьдчилсан байдлаар жолооч үүрэглэсэн байж магадгүй гэх таамаг байгаа. Жолооч нь В, С, D ангилалтай, 39 настай туршлагатай хүн байсан. Тэрбээр осол гарах үед согтууруулах ундаа хэрэглээгүй болох нь тогтоогдсон” гэв. Харин Улаанбаатар хотын замын цагдаагийн газрын урьдчилан сэргийлэх хэлтсийн ахлах мэргэжилтэн Х.Одбаярын мэдээлснээр уг автобус зургадугаар сарын 6-ны өдөр Увс аймгаас хөдөлж, зургадугаар сарын 8-ны өдрийн 11.00 цагийн үед нийслэлд иржээ. Эргээд дөрвөн цагийн дараа буюу 15.00 цагийн орчимд Улаанбаатар хотоос Увсыг зорих иргэдийг тээвэрлэн замд гарсан байна.