Хэрвээ уншигчид санаж буй бол Авлигатай тэмцэх газрын дэргэдэх Олон нийтийн зөвлөлийн дарга Г.Баасан хэвлэлийн бага хурал хийхдээ эдгээр асуудлаас гадна УБТЗ-ын дарга Д.Жигжиднямаагийн хүү нь хар тамхитай орооцолдсон, орлогч дарга болон нэр бүхий хүмүүсийн хууль бус үйлдлүүдийн тухай дурьдсан. Энэ бүх асуудлыг дарж, холбогдох хэргүүдийг нуун дарагдуулж байгаа этгээдээр Авлигатай тэмцэх газрын даргыг онцолсон. Гэхдээ Авлигатай тэмцэх газраас өгсөн хариуд мөрдөн байцаалтын ажил хэвийн явагдаж байгаа, энэ Д.Жигжиднямаа даргын холбогдсон хэргүүдийн учрыг олоход тодорхой хугацаа шаардагдана гэсэн утгатай хариу мэдээлэл өгсөн. Тэгэхээр энэ асуудал удахгүй нэг тийшээ болох нь гэж ойлгогдож байна.

Ер нь бол "УБТЗ” ХНН нь Орос-Монголын хамтарсан цорын ганц үйлдвэрээс гадна, 1949 онд байгуулагдсанаас хойш манай улсад инженер техникийн ажилтан бэлтгэх, улс орны эдийн засгийг хөгжүүлэх ажилд үнэлж боломгүй их хувь нэмэр оруулсан нь үнэн. Гэхдээ тэр үе өнгөрсөн бололтой. Төмөр замын ахмадуудын ярьж байгаагаар Зөвлөлт засгийн үед монголын төмөр замыг хөгжүүлэх, монголчуудад мэдлэг, чадвараа шилжүүлэх үнэхээр сэтгэл сайтай дарга нар, инженерүүд ажилладаг байсан. Социализмын үед "УБТЗ” ХНН-ийг даргалж байсан Долгий, Трошкин гэх мэт олон дарга тус замыг хөгжүүлэхэд үнэхээр их юм хийсэн ч одоо цаг  нь өөр болжээ.

Сүүлийн үед монголд ажиллаж байгаа орос мэргэжилтэнгүүд өөрсдийн өндөр цалингаа хамгаалах, мөн өндөр үнээр сэлбэг оруулж ирдэг талаар "УБТЗ” ХНН-ийн албан ёсны цахим хуудсандаа төмөр замчид нээлттэй бичих болжээ.

1949 онд байгуулсан олон улсын хэлэлцээрийн ангилалд орох ЗСБНХУ, БНМАУ-ын хооронд байгуулагдсан гэрээнд "УБТЗ” ХНН-ийг байгуулах үндсэн зорилтыг "Бүгд Найрамдах Монгол Ард Улс ба Зөвлөлтийн Засагт Нийгэм Журамт Бүгд Найрамдах Холбоот Улсын хоорондох найрамдлын харилцааг бэхжүүлэн эдийн засгийн харилцааг цаашид хөгжүүлэх” гэж заасан байдаг

Гэхдээ өнөөдөр тус нийгэмлэгийн үйл ажиллагаа энэ зорилгодоо нийцэж байна уу гэсэн асуулт гарч ирж байна.

1949 оны хэлэлцээр болон түүний салшгүй хэсэг болох 1968 оны тус байгууллагын дүрэмд УБТЗ-ын дарга гурван жилийн хугацаагаар солигдох ёстой. Гэхдээ 2006 оноос хойш оросын тал бидэнд ойлгогдохгүй шалтгаанаар дарга томилох эрхийг монголын талд шилжүүлсэн. Тэгэхэд өнгөрсөн 12 жил хүрэхгүй хугацаанд монголын тал зургаан дарга сольсон. Үндсэндээ засаг солигдоход "УБТЗ” ХНН-ийн дарга солигддог бичигдээгүй хуультай болсон.

Энэ хугацаанд оросын тал замын нэгдүгээр орлогч даргыг томилж ирсэн. Ажиллаж байсан орос дарга нар сайн зүйл хийсэн байх. Гэхдээ энгийн төмөр замчдын сэтгэлд өөр зүйлээр үлдсэн байдаг. Черных Александр гэгчийн хүү нь өнөөдөр Монголд "Монретранс” гэж тээвэр зуучийн компани ажиллуулдаг. Черных дарга өөрөө Эрхүү хотод Зүүн Сибирийн төмөр замын тээврийн үйлчилгээний төвийн даргын алба хашдаг тул Монгол дахь хүүгийнхээ бизнест ихээхэн дэмжлэг үзүүлдэг байх.

Түүний дараа ажиллаж байсан Домбровский Игорь нь нэгдүгээр орлогч байхдаа өөрийн төрсөн Красноярск хотод "Торговый дом Николаевский” гэгч аж ахуйн нэгжийг өөрийн охины нэр дээр байгуулж "УБТЗ” ХНН-тэй олон гэрээ байгуулж, хэдэн төгрөгтэй болсон гэж төмөр замчид ярьдаг.

Одоогийн нэгдүгээр орлогч дарга Милостных Игорь нь Монголд эрүүгийн хэргээс зугтааж ирсэн гэж зарим оросын сайтууд бичсэн байна.

Тухайлбал, Эрхүү хотын Бабр24.com сайт нь 2017 онд Эрхүү хотын ойролцоо оршдог Ангарск хотын нефть боловсруулах үйлдвэрээс нефть бүтээгдэхүүнийг хууль бусаар их хэмжээгээр тээвэрлэж байсан тухай мэдээлсэн. "Дитеко” гэгч компанитай холбоотой хэргээр Зүүн Сибирийн төмөр замын цагдаагийн дарга Алексей Ракульцев, Эрхүү өртөөний цагдаагийн хэлтсийн дарга Григорий Прокофьев, Эрхүүгийн тээврийн прокурорын орлогч дарга К.Геворкян нар шоронд ялаа эдэлж байгаа.

 Бабр24.com, Тайшет24.su сайтын мэдээлж байгаагаар Игорь Милостных Зүүн Сибирийн төмөр замын орлогч дарга байхдаа энэ хэргүүдийн талаар мэдээгүй байх үндэслэл байхгүй бөгөөд, түүнийг ажлаас нь бууруулж "УБТЗ” ХНН-ийн нэгдүгээр орлогч даргаар томилсон нь эрүүгийн хэргээс мултлах ажиллагаа байсан.

Үнэхээр өмнө ажиллаж байсан А.Ушаков нь хоёр жил ч бололгүй нутаг буцаж, түүний оронд И.Милостных гэнэт томилогдсон нь тухайн үед олны хачирхлыг төрүүлж байсан. Учир нь эрүүгийн хэргээс мултлах зорилготой байсан байх өндөр магадлалтай байна.

Сахалт Сталины үеийн гэрээгээр амьдраад, хоёр талаас нь хэмлээд байхад УБТЗ нь хөгжихгүй байх нь аргагүй ч юм уу даа.