Сүүлийн хэдэн өдөр Монголын нийгэм нэлээн "шуугиантай” байлаа. "Оюутолгойн гэрээ”, "Дубайн гэрээ” зэрэгтэй холбоотойгоор Ерөнхий сайд асан С.Баяр, Ч.Сайханбилэг нарыг баривчилсан. Үүнд олон нийт ч сэтгэл ханамжтай байгаа.

Харин С.Баяр шүүх хурлын үеэр байр сууриа илэрхийлэхдээ "Өнөөдөр намайг сарын хугацаагаар цагдан хорих нь сонин биш. Оюутолгойн гэрээтэй холбоотойгоор хоёр Ерөнхий сайдыг хорьж байна гэдэг нь өнөөдөр Монголын нэр хүнд дэлхий дахинаа унах, цаашлаад Оюутолгойн хувьцаа унах асуудал үүсэж болзошгүй” хэмээн хэлжээ.

С.Баяр Оюутолгойн хувьцаа болон эх орныхоо нэр хүндэд их л санаа зовинож байгаа бололтой. Гэвч үнэндээ энэ үг нь хөх инээд хүргэж байна. Тэртээ тэргүй улсынхаа баялгаас "завшиж", гадны улс оронд оффшор данс нээж, энд тэнд үл хөдлөх хөрөнгө худалдаж авч байгааг чинь дэлхий нийт мэднэ. Тиймээс увайгүй улстөрчид та нар дэлхийн дахинаа Монголын нэр хүндийг аль эрт унагасан.   Харин одоо дахиж унаад байх нэр хүнд үлдсэн гэж үү?

Тэгээд ч бодит байдал дээр Монголын ард түмэнд Оюутолгойн гэрээ яаж үр ашгаа өгч байна вэ? Улсад хэдхэн хувийн татвар төлж, үлдсэнийг нь гадныханд "тавиад туучихаж” байгаа энэ гэрээнд Монголын ард түмэн санаа зовох тэнхэл яг үнэндээ алга. Оюутолгойн хувьцаа унах, эсвэл хэдхэн улстөрч болон гадныхан үр ашгийг нь хүртэх гэсэн хоёрхон зам байгаа юм бол ард түмэнд аль нь ч ялгаагүй. Харин юуны түрүүнд үнэн мөнийг олж, авлигачдыг баривчлан, зохих ялыг оногдуулж, бусдад нь сургамж өгөх хэрэгтэй байна.

Тэгээд ч ард түмэнд ашиггүй гэрээ хийж, улсын баялгаас хувьдаа завшсан байж болзошгүй этгээдүүдийг мөрдөн шалгаж чадахгүй аваас Монголын шүүхийн нэр хүнд дэлхийн тавцанд унах биш үү.

Хятад Улсын Ерөнхийлөгч л гэхэд авлигатай тууштай тэмцэж, авлигачдыг хашрааснаараа, 10 сая иргэнээ ядуурлаас гаргаж чадсан.

Тодорхой хэмжээнд золиос гаргаж байж, том үр дүнд хүрдэг бололтой. Харин Монголчууд бидэнд зориг л дутаад байх шиг.

Caaknews.mn