Өнгөрсөн ням гарагт Газын зурваст Израилийн тусгай хүчний явуулсан ажиллагааны үеэр зургаан палестин иргэн амь үрэгдсэний дунд террорист "Хамас” бүлгийн коммандлагч багтаж байсан тухай Палестинийн холбогдох албаны төлөөлөгч мэдээлэв.

 

Израилийн зэвсэгт хүчнээс мэдээлснээр, дээрх ажиллагааны үеэр тус улсын цэргийн нэг албан хаагч амь үрэгдэж, нэг цэрэг шархадсан аж.

Уг хэрэгтэй холбогдуулан Израилийн Ерөнхий сайд Бенжамин Нетаньяху Парис хотод зохион байгуулсан Дэлхийн нэгдүгээр дайн дууссаны 100 жилийн ойн арга хэмжээний үеэр Францад хийх айлчлалын хугацаагаа богиносгох шийдвэр гаргасан тухай түүний албанаас мэдээлжээ.

"Хамас” бүлгийн хэвлэлийн албаны төлөөлөгчийн мэдээлснээр, тус бүлгийн "Изедин аль-Кассам” бригадын коммандлагч Шейх Нур Бараке амь үрэгдсэн бөгөөд Израилийн тусгай хүчин Газын зурвасаас дотогш гурав орчим километр зайд тээврийн хэрэгслээс гал нээсэн аж.

 

Үүний дараа талууд харилцан гал нээсэн бөгөөд Израилийн талаас өгсөн агаарын цохилтын улмаас дэлбэрэлтүүд үүссэн гэж тухайн үед хэргийн газрын ойролцоо байсан хүмүүс мэдээлсэн байна.