Израиль Газын зурваст агаарын цохилт өгч эхэлжээ
Израилийн нисэх онгоцууд тус улсын Беэр-Шева хот руу пуужин харвасны хариуд Газын зурваст лхагва гарагт агаарын цохилт өгч эхэлжээ.
"Одоогийн байдлаар Израилийн Агаарын цэргийн хүчний сөнөөгч онгоцууд Газын зурваст террористуудын байрлалд цохилт өгч байна” гэж цэргийн албан ёсны мэдээлэлд дурджээ. Хариу цохилтын талаар одоогоор үүнээс өөр мэдээлэл байхгүй байна.
Беэр-Шева хотод урьд нь Пуужингийн довтолгооноос эсэргүүцэн хамгаалах системийн дохио дуугарч оршин суугчдад пуужин харвах гэж буйг анхааруулжээ. Үүний дараахан Газын зурвасаас хоёр пуужин харвасан тухай цэргийнхэн мэдээлсэн байна. Пуужингуудын нэг нь Израилийг чиглэж, нөгөө нь далайд унажээ. "The Times of Israel” сонинд мэдээлснээр, пуужин Беэр-Шева хотод айлын хашаанд дэлбэрсэн бөгөөд амь эрсэдсэн болон шархадсан хүн байхгүй боловч хохирол учирсан байна.
Беэр-Шева хот нь Газын зурвасаас зүүн зүгт 40 км-ын зайтай газар оршдог аж. Тус хот руу пуужин харвасныг Израилийн эрх баригчид байдлыг улам хурцатгаж байна гэж үзэж байна. Урьд нь наймдугаар сарын 9-нд Газын зурвасаас Беэр-Шева хот руу пуужин харваж байсан бөгөөд үүнээс өмнө 2004 онд Израилийн армийн тус зурваст явуулсан сүүлийн ажиллагаа болох "Эвдэршгүй хад” ажиллагаа дууссанаас хойш тус хот руу пуужин харваагүй юм.