Ж.Трюпо, П.Порошенко нар Керчийн хоолойд болсон үйл явдлыг хэлэлцжээ
Канадын Ерөнхий сайд Жастин Трюдо, Украины Ерөнхийлөгч Петр Порошенко нар утсаар ярилцах үеэрээ Керчийн хоолойд болсон үйл явдлыг хэлэлцжээ. Энэ тухай Канадын Ерөнхий сайдын хэвлэлийн алба мэдээлсэн байна.
Талууд энэ сарын 25-нд Керчийн хоолойд Оросын гаргасан үйлдлийг хэлэлцэхийн сацуу нөхцөл байдлыг даруй намжааж, Украины хөлөг онгоцуудыг болон багийн гишүүдийг суллахын тулд холбоотнуудтайгаа хамтран Орост хэрхэн шахалт үзүүлэх асуудлыг хэлэлцжээ. Түүнчлэн Украины бүрэн эрхт байдал, нутаг дэвсгэрийн бүрэн бүтэн байдлыг Канад улс тууштай дэмжинэ гэдгээ Ж.Трюдо илэрхийлжээ.
Хар тэнгис болон Азовын тэнгисийн дунд орших Керчийн хоолойд байсан Украины гурван хөлөг онгоц руу ОХУ гал нээж, багийн гишүүдийг баривчилсан үйл явдал энэ сарын 25-нд болсон юм.