Өнгөрсөн ням гарагт Энэтхэгийн бүх нийтийн сонгуулийн санал хураалт тус улсын нийслэл Шинэ Дели хотод болжээ.

 

Өнгөрсөн дөрөвдүгээр сарын 11-нд эхэлсэн сонгуулийн санал хураалт 7 үе шаттайгаар үргэлжилж, тавдугаар сарын 19-нд дуусна. Улиран сонгогдохыг эрмэлзэж буй Ерөнхий сайд Нарендра Модигийн Бхаратия Жаната нам болон сөрөг хүчний Конгресс намын хооронд гол өрсөлдөөн өрнөх төлөвтэй байна.

"Би эрх баригч намаас нэр дэвшигчид саналаа өгсөн. Н.Модигийн засаглал Энэтхэгийг хөгжүүлж байна" гэж нэгэн сонгогч хэлжээ. Харин сөрөг хүчний намд саналаа өгсөн өөр нэгэн эмэгтэй залуучуудын ажилгүйдэл газар авч буйд Засгийн газрыг буруутгажээ.

Сонгуулийн ирц 67 хувьтай байгаа тухай Сонгуулийн комиссийн төлөөлөгч мэдээлсэн байна. Энэ нь таван жилийн өмнөх сонгуулийн ирцтэй ойролцоо үзүүлэлт юм. Сонгогчдын саналын хуудсыг тавдугаар сарын 23 гэхэд тоолж дуусна хэмээн төлөвлөж байна.