Израилын Ерөнхийлөгч Реувен Ривлин дараагийн Засгийн газрыг эмхлэн байгуулахыг тус улсын Ерөнхий сайд Биньямин Нетаньяхугаас хүссэн байна.

 

Б.Нетаньяху болон түүний гол өрсөлдөгч Бенни Ганц нар нэгдлийн Засгийн газар байгуулах гэрээний талаар тохиролцоонд хүрч чадаагүйтэй холбогдуулан Р.Ривлин уг шийдвэрийг гаргажээ.

Өнгөрсөн долоо хоногт явуулсан бүх нийтийн сонгуулиар аль нэг нам олонхын суудал авж чадаагүй бөгөөд Израилд энэ онд явуулсан хоёр дахь сонгууль энэ болсон юм. Уг сонгуулиар Б.Ганцын "Цагаан-Цэнхэр” эвсэл 33 суудал авсан бол Б.Нетаньяхугийн "Ликуд” нам 31 суудал авсан байна.

Б.Нетаньяху одоо 6 долоо хоногийн дотор Засгийн газрыг эмхлэн байгуулах шаардлагатай болжээ. Бүх нийтийн сонгуулийг энэ онд гурав дахь удаагаа явуулахгүйн тулд чадах бүхнээ хийнэ гэж Израилын Ерөнхийлөгч амласан билээ.

Р.Ривлин лхагва гарагт мэдэгдэхдээ, Б.Нетаньяху Засгийн газрыг эмхлэн байгуулах магадлал илүү өндөр гэжээ. Гэсэн хэдий ч Б.Нетаньяху өнгөрсөн дөрөвдүгээр сард эвслийн Засгийн газар байгуулж чадаагүй юм.

Израилын хуулийн дагуу Ерөнхий сайдын албан тушаалд парламентад олонхын суудал авсан намын дарга нэр дэвших боловч Ерөнхийлөгч сайд нарын танхимыг бүрдүүлэх үүргийг нам нь олонхын санал аваагүй хэдий ч тогтвортой эвсэл байгуулах чадвартай улс төрчид хүлээлгэж болдог ажээ.