УИХ-ын 2016 оны сонгуулиар ард түмэн сонголтоо хийж МАН-65, АН-9, МАХН-1, бие даагч 1 суудал авахаар болоод буй. Энэхүү сонголтоос харахад МАН дангаараа засаг байгуулж, АН арайхийн бүлэг байгуулах хэмжээний суудал авлаа.

Хуульд заасны дагуу Сонгуулийн ерөнхий хорооноос нэр дэвшигчдийн нэрсийг эцсийн байдлаар гаргаж, түр үнэмлэх олгон улмаар сонгууль явагдсанаас хойш 15 хоногийн дотор УИХ-ын гишүүдийн нэрсийг Ерөнхийлөгчид өргөн мэдүүлнэ. Үүний дараа Ерөнхийлөгч анхдугаар чуулганыг зарлан хуралдуулах зарлиг гаргах юм.

Одогийн байдлаас дүгнээд үзэхэд зургаа дахь парламентийн гишүүд чуулганаа хааж амжаагүй байгаа ч анхдугаар парламентийг зарлан хуралдуулж, гишүүд тангарагаа өргөснөөр өмнөх парламентийн бүрэн эрх дуусгавар болно. Өмнөх 2012 оны анхдугаар чуулганыг долдугаар сарын 6-нд зарлан хуралдуулах зарлигийг Ерөнхийлөгч гаргаж байсан тул энэ удаад ч мөн адил энэ үеэр зарлах болов уу гэсэн таамаг байна.

Д.ЖАРГАЛ