АНУ-ын Нью-Йорк хотын захирагч асан Майкл Блумберг 2020 оны ерөнхийлөгчийн сонгуулийн Ардчилсан нам доторх сунгаанд өрсөлдөнө гэдгээ өнгөрсөн 11 дүгээр сард мэдэгдсэнээсээ хойш дижитал, телевизийн зар сурталчилгаанд 120 орчим сая ам.долларыг зарцуулсан байна.

 

"Politico” компанийн мэдээлснээр, М.Блумбергийн зар сурталчилгаандаа зориулсан зардал сунгаанд өрсөлдөж буй тэрбумтан биш нэр дэвшигч тутмын бүтэн жилийн зардлаас хоёр дахин их байсан ажээ. Түүнчлэн Нью-Йорк хотын захирагч асан Калифорни, Техас, Флоридад бусад муж улсаас илүү их төсвийг зориулжээ.

"Бид ерөнхийлөгчийн сонгуулийн нам доторх сунгаанд өрсөлдөгч ийм их зардал гаргаж байгааг анх удаа харж байна. М.Блумберг хязгааргүй төсөвтэй бололтой” гэж Бүгд найрамдах намын улс төрийн стратегич Жим МакЛоглин хэлсэн байна.

2020 оны ерөнхийлөгчийн сонгуулийн Ардчилсан намын сунгаанд өрсөлдөгчдийн санал асуулгын жагсаалтыг дэд Ерөнхийлөгч асан Жо Байден 31 хувийн саналаар тэргүүлж байгаа бол түүний араас Берни Сандерс, Элизабет Уоррен, Пит Буттигег нар бичигдэж байна. М.Блумбергийн хувьд уг жагсаалтын тавдугаарт эрэмблэгджээ.