Ираны эрх баригчид Украины зорчигч тээврийн нисэх онгоцыг сөнөөсөн хэрэгт холбогдуулан хэд хэдэн хүнийг баривчилсан тухай тус улсын Дээд шүүхийн албан ёсны төлөөлөгч Голям Хосейн Исмаили мэдээлжээ.

 

"Энэ хэрэгт буруутай хүмүүсийг бид баривчилсан, гэхдээ мөрдөн шалгах ажил дөнгөж эхний шатандаа явж байна” гэж тэрбээр цохон хэлсэн байна.

Америкийн цэргүүдийн байрлаж буй Иракийн баазуудад Иран улс өнгөрсөн долоо хоногийн лхагва гарагт пуужингийн цохилт өгснөөс хэдхэн цагийн дараа Украины "Boeing 737-800” нисэх онгоц осолдож, 176 хүн амиа алдсан юм. Уг онгоц пуужингийн цохилтод өртсөн байж болзошгүй гэж Өрнөдийн орнуудын удирдагчид мэдэгдсэн билээ. Ираны эрх баригчид энэ мэдэгдлийг няцааж байсан боловч Украины онгоц руу андуурч пуужин харвасныг өнгөрөгч бямба гарагт хүлээн зөвшөөрсөн юм.