БНХАУ-ын Ухань хотод дэгдсэн шинэ төрлийн коронавирусний халдварын тархалтын талаар худал мэдээлэл тараасан иргэдэд хариуцлага тооцсон талаар Тайландын Засгийн газрын төлөөлөгч пүрэв гарагт мэдэгдсэн байна.

 

Тайландын Дижитал эдийн засаг, нийгмийн асуудал хариуцсан сайдын мэдээлснээр, Тайландын Компьютерийн гэмт хэргийн тухай хуулийг зөрчсөн хэмээн хоёр хүнд хариуцлага тооцсон ажээ. Тэдний нэг нь нийгмийн сүлжээнд вирусний талаар буруу ташаа мэдээлэл бүхий дүрс бичлэг нийтэлсэн бол нөгөө нь Тайландын далайн эргийн хотод вирусний халдвар бүртгэгдсэн хэмээн худал мэдээлэл тараажээ. "Тэдэнд 5 хүртэлх жилийн ял ногдуулж магадгүй" гэж "AFP” агентлагийн мэдээнд тэмдэглэжээ.

"Гэмт этгээдүүд буруу ташаа мэдээлэл тараасан гэдгээ хэдийн хүлээн зөвшөөсөн. Худал мэдээлэл тараасан хүмүүсийг мөрдөн шалгах ажиллагааг цаашид үргэлжлүүлнэ. Та бүхэн мэдээллийн эх сурвалжуудыг сайтар нягтлах хэрэгтэй” гэж Дижитал эдийн засаг, нийгмийн асуудал хариуцсан сайд мэдээлжээ. Тайландад пүрэв гарагийн байдлаар коронавирусний халдварын 14 тохиолдол бүртгэгдсэн бөгөөд илэрсэн тохиолдлынхоо тоогоор Хятадын араас бичигдэж байна.

"2019-nCoV” коронавирусээр халдварласан хүмүүсийн тоо Азид 2003 онд дэгдсэн амьсгалын замын цочмог халтай хам шинжийн /SARS/ тохиолдлын тооноос хэдийн давжээ. 2003 онд "SARS”-ыг үүсгэдэг вирусээр 8000 гаруй хүн халдварлаж, 774 хүн нас баржээ.