Есдүгээр сарын гуравны өдөр ОХУ даяар Дэлхийн хоёрдугаар дайн дууссаны 75 жилийн ойг тэмдэглэсэн. Энэ үеэр Оросын Санкт-Петербург хотын "Петровский” цэнгэлдэх хүрэлэнд 2200 дрон хөөргөн , агаарын шоу үзүүлжээ.

Олон мянган үзэгч үзэж сонирхсон энэ шоуны эхэнд дронууд "2020 он дурсгал, алдрын он” гэсэн бичгийг Оросын төрийн далбааны гурван өнгөөр гаргасан байна. Дараа нь тэнгэрт Ялалтын одон, алдартай түүхэн гэрэл зураг дээр дүрслэгдсэн байдаг батальоны командлагч мөн "Энх тайвны тагтаа”-г дүрсэлжээ. Энэ шоу 10 орчим минут үргэлжилсэн байна.

Петербург хотод болсон энэхүү шоу дэлхийн дээд амжилтыг эвдсэн талаар Life.ru мэдээллээ. Өмнөх дээд амжилт 2018 дрон ашигласан байсан бөгөөд Орост 2200 дрон ашигласнаар ийнхүү шинэ амжилт тогтоосон байна.

"Энэ бол дэлхийн шинэ дээд амжилт. Өмнө нь 2018 онд "Интел” компани дээд амжилт тогтоож байсан юм. Бид энэ төсөлд хоёр жил бэлдсэн. Бид үнэхээр баяртай байна, энэ үзүүлбэр бидэнд үнэхээр чухал” хэмээн дроны шоуг зохион байгуулагчид ярьжээ.

Петербургийн тэнгэрт хөөргөсөн бүхий л дроныг энэ хотод бүтээсэн бөгөөд шоу зохион байгуулагчид бүгдийг өөрсдөө хийж, угсран программчилсан байна. Эдгээр дронууд нь тод гэрэлтэх гэрлэн диод дэнлүүтэй, шоунд зориулсан тусгай дрон аж.

Г.Бямбасүрэн

Shuud.mn