Португалын домогт Кристиано Роналдо одоохондоо шигшээ багаасаа зодог тайлах хүсэлгүй байгаагаа мэдэгджээ. Гэхдээ цаг нь ирвэл тийм ч хэцүү шийдвэр биш гэнэ. Өдгөө 39 настай тэрбээр хөлбөмбөгийн түүхэнд шигшээ багийнхаа төлөө хамгийн олон тоглолтод оролцож, хамгийн олон гоол оруулсан эрхэм билээ. Түүний хувьд Португалын төлөө 212 тоглолтод 130 гоол оруулсан гэх сүрдэм үзүүлэлттэй.

Роналдогийн хувьд Португалын шигшээ багтаа дуудагдсан бөгөөд ирэх өдрүүдэд Үндэстнүүдийн лигийн хүрээнд Хорват, Шотландын эсрэг талбайд гарах боломжтой.

Роналдо саяхан өгсөн ярилцлагадаа "Цаг нь ирэхээр би яваад өгнө. Хэрэв би хэрэггүй мэт санагдвал хамгийн түрүүнд явна. Энэ тийм ч хэцүү шийдвэр биш байх болно" гэжээ.

Манчестер Юнайтед, Реал Мадридад домог гэж дуудуулж, хүртэж үзээгүй цомгүй тэрбээр өдгөө Саудын Арабын Аль-Насср клубд тоглож буй. Өнгөрсөн зуны Европын аваргаар гоол оруулж чадаагүй түүнийг шүүмжлэх хүмүүс олон байсан. Гэсэн хэдий ч шигшээ багаасаа зодог тайлах талаар ер бодоогүй аж.

Роналдотой нэгэн цаг үед шигшээ багт хамт тоглож явсан Хосе Фонте Еврогийн үеэр "Роналдо, Пепе хоёр магадгүй шигшээ баг дахь төгсгөл нь энэ гэдгийг мэдсэн байх. Тэд Португалын төлөө маш их зүйл хийж, бүтээсэн. Заримдаа залуу үедээ зайгаа тавьж өгөх нь зөв байдаг" гэсэн юм.

Европын аваргын дараа 41 настай Пепе зодог тайлсан.

Кристиано Роналдо өнгөрсөн сард ярихдаа "Хэзээ зодог тайлахаа би мэдэхгүй байна. Удахгүй юу эсвэл хоёр, гурван жилийн дараа юу? Гагцхүү энд, Аль-Насср клубд зодог тайлж магадгүй. Шигшээ багаасаа зодог тайлахдаа би хэн нэгэнд урьдчилж хэлэхгүй. Миний тааллаараа гаргах шийдвэр байх болно. Мэдээж маш сайн бодож шийдвэрээ гаргана" гэжээ.