Хаан банкны эзэмшигч Ч.Баатарсайханы хүү бусадтай бүлэглэн бусдын эрүүл мэндэд ноцтой хохирол учруулсан
Долдугаар сарын 18-19-нийг шилжих шөнө "Хүүхдийн 100", "Канте” шөнийн цэнгээний газрын гадаа талбайд 25-29 настай нэр бүхий дөрвөн этгээд гудамжид гэмгүй явсан иргэний биед бүлэглэн халдаж, хүнд гэмтээсэн хэрэг гарсан. Энэ хэргийг мөрдөн шалгах ажиллагаа үргэлжилж, зодоонд оролцсон хоёр иргэнийг эрэн сурвалжилж байна гэж мэдэгдлээ. Гэхдээ хүн зодсон дөрвөн залуу согтуу байсан нь тогтоодсон ч, хар тамхи хэрэглэж мансуурсан эсэх шинжилгээний хариу гараагүй, нэр бүхий улстөрч, бизнесмэний хүүхдүүд гэж шууд хэлэх боломжгүй гэж ЦЕГ-аас "бөөрөнхий" мэдэгдэл хийв.
Мөн цагдаагаас гэмт этгээдүүд улс төрчдийн хүүхдүүд эсэхийг шууд хэлэх боломжгүй гэх ч, бусад эх сурвалж, танхайрсан этгээдүүд нь Эрэлийн гэгдэх Б.Эрдэнэбатын Тэмүүлэн, УИХ-ын гишүүн асан Ц.Цэрэнпунцагийн Санжаачойпэл, Таван богд групп, Хаан банкны эзэмшигч Ч.Баатарсайхан нарын хүүхдүүд гэж мэдээлж буй.
Гэтэл Дүүргийн Эрүү, Иргэний хэргийн хялбар ажиллагааны анхан шатны тойргийн шүүхийн шийдвэрээр Эрдэнэбатын Тэмүүлэнг 2025 оны 07 дугаар сарын 20-ны өдрийн 21 цаг 40 минутаас, Цэрэнпунцагийн Санжаачойпэлийг мөн өдрийн 22 цаг 00 минутаас сэжигтнээр тус тус баривчилжээ.
Цэрэнпунцагийн Санжаачойпэл нь "Жемнэт” нэртэй ХХК-ийн өмчлөгч байжээ. УИХ-ын гишүүн асан Ц.Цэрэнпунцаг "Жем интернэшнл" ХХК-аар овоглодог. Ц.Санжаачойпэл мөн Спэйс гайминг ХХК-д хувь эзэмшдэг юм
Шүүхийн зөвшөөрлөөр баривчилж саатуулсан хугацаа нь Эрүүгийн хэрэг хянан шийдвэрлэх тухай хуульд зааснаар 48 цагаас хэтэрч болохгүй бөгөөд Эрдэнэбатын Тэмүүлэнг сэжигтнээр баривчлах хугацаа 2025 оны 07 дугаар сарын 22-ны өдрийн 21 цаг 40 минутаас, Цэрэнпунцагийн Санжаачойпэлийг сэжигтнээр баривчлах хугацаа 2025 оны 07 дугаар сарын 22-ны өдрийн 22 цаг 00 минутаар дуусгавар болох юм. Харин цагдаад баригдаагүй хоёр этгээдийн нэг нь Ч.Баатарсайханы хүү. Тэрээр хил даван оргон зайлсан гэж албан эх сурвалж мэдээлэл өглөө. Харин гэрчүүдийн нэг нь ЦЕГ-ын дарга асан Ж.Болдын хүү гэх мэдээлэл байна
Сэтгэгдэл байхгүй байна.