"Эрэл” компанийн захирал Б.Эрдэнэбатын хүү 29 настай Э.Тэмүүлэн, УИХ-ын гишүүн асан "GEM групп”-ийн эзэн, улсын гарди Ц.Цэрэнпунцагийн хүү 28 настай Ц.Санжаачойпэл нарыг мансуурсан үедээ бусдыг хэрцгийгээр зодож гэмтээсэн болохыг цагдаагийн байгууллагаас мэдээлсэн. Мөн "Таван богд" группийн эзэн Ц.Баатарсайханы хүү Б.Амарсайхан зодоонд оролцсон ч өчигдөр хил даван зугтжээ. Хэргийг сануулбал, Сүхбаатар дүүргийн III хорооны нутаг, ХААН банк байрлаж буй байрны эсрэг талд орших "Cante” гэх шөнийн цэнгээний газрын үүдэнд энэ сарын 18-19-нд шилжих шөнийн 03.45 цагийн үед зодоон болж, нэг залуу хүнд гэмтсэн байна. Хохирогч С-гийн гавал, тархины гэмтэлтэй ГССҮТ-д хэвтэн эмчлүүлж буй бөгөөд биеийн байдал нь хүнд, нэг нүд нь юм харахгүй байгаа аж. Түүнийг найзуудтайгаа баарнаас гарч явахад, Э.Тэмүүлэн, Ц.Санжаачойпэл нар өдөж, шууд биед нь халдсан байна. Хохирогч залуугийн эгч энэ талаар олон нийтэд мэдээлснээр, цагдаагийн байгууллага сая нэг юм хөдөлж, хэрэгт холбогдогсдыг баривчилж, хар тамхины шинжилгээ авахад хэрэглэсэн нь тогтоогдсог гэнэ. Харамсалтай нь хэт удаан байсан тул хэрэгт оролцсон нэг этгээд болох Ц.Баатарсайханы хүү Б.Амарсайхан хил даван зугтах боломжийг олгожээ.

Зарим эх сурвалжийн мэдээлж буйгаар, ЦЕГ-ын дарга асан Б.Болдын хүү мөн оролцсон байх магадлалтай байгаа аж. Мөн цөөнгүй бизнесмэнүүдийн хүүхдүүд ч оролцсон байна.