Улс төрийн тогооны халууны хэм өдөр өдрөөр нэмэгдэж байгааг үйл явдлууд гэрчилж буй. Ямартай ч өнөөдөр Ч.Сайханбилэгийг Ерөнхий сайдын суудлаас буух цаг нь болсон эсэхийг УИХ-ын Төрийн байгуулалтын байнгын хорооны хуралдаанаар хэлэлцэх ёстой ч, яг одоогоор бол ирц бүрдэхгүй байна. Тодруулбал, тус байнгын хороонд харъяалагддаг АН-ын гишүүд болох Ч.Сайханбилэг, С.Баярцогт, А.Бакей, М.Батчимэг, Х.Тэмүүжин, Н.Батбаяр, Р.Гончигдорж, Н.Алтанхуяг нар хуралдааны танхимд суудлаа эзлэн сууцгаагаад байгаа бол МАН-ын бүлгээс Н.Энхболд л картаа уншуулсан ч, буцаагаад сугалж аваад гараад явж. Харин Ерөнхий сайдыг огцруулах төсөлд гарын үсэг зурсан МАН-ын бүлгийн бусад гишүүд одоогоор чимээгүй байна. Мөн огцруулах төслийг өргөн мэдүүлсэн Г.Уянга гишүүн ирээгүй байна.