Даваа гариг болгоны 16.00 цагаас Засгийн газрын ээлжит хуралдаан болдог уламжлалтай. Энэ дагууЗасгийн газар ээлжит хуралдаан зарлаж, Тавантолгойн гэрээний төслийг эргүүлэн татах асуудлыг хэлэлцэнэ гэсэн мэдээлэл байна. Энэ талаар баасан гаригт Их тэнгэрт болсон бизнес уулзалтын үеэр ЗГХЭГ-ын дарга С.Баярцогт ам алдсан бололтой.

Засгийн газар Тавантолгойн тогтоолын төслийг хоёр сарын өмнө буюу дөрөвдүгээр сарын 22-нд өргөн барьсан. Уг тогтоолын төслийг УИХ-аар хэлэлцүүлэх эсэхийг шийдэх ажлын хэсгийг УИХ-ын дарга З.Энхболд гаргасан. Ажлын хэсгийн зүгээс Засгийн газраас өргөн барьсан Тавантолгойн гэрээ Монгол Улсын зарим хуулиудыг зөрчсөн байна гэж үзэж байгаагаа ахлагч Л.Эрдэнэчимэг нь хэвлэлд мэдээлэл өгөх бүртээ л хэлэх болсон билээ.

Ажлын хэсгийн ахлагчийн зүгээс Тавантолгой- Гашуунсухайт чиглэлийн төмөр замд гол анхаарлаа хандуулж буйгаа, мөн хөрөнгө оруулагчдын зүгээс санал болгосон "Энержи ресурс” багагүй өр ширтэй байгааг ч баримт дэлгэн ярих болсон билээ. Тэгвэл албаны эх сурвалжийн хэлснээр Засгийн газар тогтоолын төслөө буцаан татаж, ажлын хэсгийн тавьж байгаа зарим шаардлагыг тусгаад хаврын чуулган хаахаас өмнө эргүүлэн барихаар болсон байна.

Тиймээс Тавантолгойн асуудал дээр саарал ордонд "зодолдож” байгаа бүлэглэлүүд ерөнхийдөө санал нэгдсэн, Засгийн газар төслөө эргүүлэн авч, зарим нэг шаардлагатай асуудлыг тусгаад хаврын чуулганаас гэрээ байгуулах зөвшөөрлөө бараг авах байх гэсэн мэдээлэл улс төрийн хүрээнийхний дунд яригдаж эхэллээ.

Тавантолгойн төсөл хэзээ хэлэлцэх вэ гэдгийг УИХ-ын гишүүд, ялангуяа МАН-ын гишүүдийн зүгээс УИХ-ын дарга З.Энхболдоос асууж сураглах болсон юм. Засгийн газар тогтоолын төслөө буцаан татахтай холбоотойгоор хөрөнгө оруулагчдад энэ асуудалд хэрхэн реакци үзүүлэхийг мэдэхгүй ч гэхдээ ямар ч байсанТавантолгойн гэрээний төсөл дээр үзэл бодлын зөрчилтэй байгаа талууд ойлголцож эхэлсэн бололтой.

Өөрөөр хэлбэл, Засгийн газар тогтоолын төслөө буцаан татаж авсан нэрээр дахин өргөж барьж, талуудын тохиролцсон хувилбараар явсан тохиолдолд Тавантолгойн гэрээ УИХ-аас ногоон гэрлээр шуударч магадгүй гэх мэдээлэл ч саарал ордонд яригдах болжээ.