Экс Ерөнхий сайд Н.Алтанхуяг Үндэсний аюулгүй байдлын зөвлөлд хандаж өчигдөр албан бичиг илгээжээ. Тэрээр үндэсний аюулгүй байдлын асуудлаар УИХ-ын хаалттай чуулган хуралдуулахыг хүссэн байна.

Энэ тухайгаа "Монгол Улсын үндэсний язгуур ашиг сонирхол болох Монгол Улсын бүрэн эрхт байдал, үндэсний эв нэгдэл, үндсэн хуульт байгууллын аюулгүй байдал, эдийн засгийн бие даасан байдалд бодит эрсдлүүд тулгараад байна.

Монгол Улсын Үндсэн хуулийн хорьдугаар зүйлд "УИХ бол төрийн эрх барих дээд байгууллага мөн бөгөөд хууль тогтоох эрх мэдлийг гагцхүү УИХ-д хадгална” гэж заасанчлан УИХ-ын хаалттай хурал зарлан хуралдуулж улс орныхоо өнөөгийн байдлын талаар улстөргүйгээр бодит үнэлэлт дүгнэлт өгөн хэлэлцэх шаардлага тулгараад байна.

Энэ асуудлыг УИХ-ын нэр бүхий гишүүд ил далдаар яриад удаж байгаа боловч хэлэлцэх боломж нөхцөл бүрдэхгүй өнөөдрийг хүрлээ. Зарим тохиолдолд улс төрийн институцууд, засаглалын зарим байгууллага, албан тушаалтны шахалт, дарамтаас шалтгаалан ил гаргаж ярихаас ч эмээх болжээ.

Иймээс нэн даруй үндэсний аюулгүй байдалтай холбоотой дээрх асуудлыг УИХ-аар хаалттай хэлэлцэх нөхцөл үүссэнийг харгалзаж УИХ-ын хаалттай чуулган зарлах санаачлага гаргаж буйг хүлээн авна уу” хэмээжээ.