Грекийн Ерөнхий сайд А.Ципрас өчигдөр Германы канцлер А.Меркельтэй утсаар ярьжээ. Энэ үеэр өнөөдөр Бельгийн Брюссельд болох евро бүсийн тэргүүнүүдийн уулзалтад Грект санхүүгийн дэмжлэг үзүүлэхэд чиглэгдсэн шинэ саналыг гаргахаа А.Ципрас мэдэгдсэн байна.  

Түүний гаргасан шинэ саналын агуулга одоогоор тодорхойгүй байгаа юм.  Грекийн ард түмэн  энэ сарын 5-ны өдөр явагдсан олон нийтийн санал асуулгаар  Европын холбоо зэрэг зээлдүүлэгчдийн санхүүгийн дэмжлэгийн нөхцөл болох хэмнэлтийн бодлогын эсрэг байгаагаа илэрхийлсэн тул А.Ципрасын энэ уулзалтаар гаргах санал дэлхий дахины анхаарлыг татаж байна. 

Нөгөөтэйгүүр, Грекийн Засгийн газар Дотоодын банкны тэргүүнүүдтэй өчигдөр уулзаж, гадаад гуйвуулгыг хязгаарлах, хадгаламжийн чек гаргах зэрэг асуудлаар хэлэлцсэн боловч, хугацааг өмнө нь төлөвлөж байснаасаа хоёр хоногоор сунгаж, маргааш орой хүртэл уулзалтаа үргэлжлүүлэхээр болсоноо зарлав.