Азийн өсвөрийн хөлбөмбөгчдийн фестиваль БНСУ-ын Ансон хотноо болж өндөрлөлөө. Өдгөө гурав дахь болж буй энэхүү тэмцээнд  маш олон орон оролцож, өрсөлдөөнийг улам чанартай болгосноороо өмнөх жилүүдийнхээс илүү онцлогтой байсан аж. Харин  энэ жил хоёр дахь удаагаа тус тэмцээнд оролцож байгаа манай улсын хувьд мөн өндөр ач холбогдол өгч нийт дөрвөн баг оролцуулсан байна.  

Тодруулбал, Сүхбаатар аймгийн баг, Чингэлтэй дүүргийн Засаг даргийн дэргэдэх өсвөрийн шигшээ баг.  Мөн Хүчит-Чулуут ДМЮ болон Хараацай клубын тамирчид эх орноо төлөөлөн тус фестивальд оролцсон байна.

Тамирчдын ур чадварын тухайд ирээдүй болсон тамирчдад дутах зүйл огт байсангүй. Жигдхэн тоглолтыг үзүүлж алсдаа хэрэгтэй маш олон зүйлийг сурж авлаа. Тэр дундаа тэмцээний эхний өдрөөс эхлэн нэг ч ялагдал хүлээгээгүй байсан Чингэлтэй дүүргийн баг сүүлийн тоглолтоо Пакистаны шигшээ багийн эсрэг тоглож 2:0 харьцаатай ялагдсанаар түрүүлэх боломжоо алдан 3-р байрт бичигдэв.  Тэд эхний тойрогтоо  БНХАУ-ын "Yinhe" клубийг 6:1-ээр хожиж, шуугиан дэгдээгээд байсан юм.  

Тэгвэл Солонгосыг зорьсон "Хүчит Чулуут-ДМЮ” болон Чингэлтэй дүүрэг, Сүхбаатар аймгийн багууд маргааш 17:50 цагт эх орондоо ирэх бол "Хараацай” клуб наймдугаар сарын 13-нд "Чингис Хаан" ОУ-ын нисэх онгоцны буудалд газардах ажээ.