Картгүй иргэд илүү мөнгө төлж, оюутнууд хоёр удаа үнэгүй зорчино
-Оюутнууд цахим картаа худалдаж аваад өдөрт 2 удаа үнэгүй зорчино-
Нийтийн тээвэрт шинэчлэл хийж байгаа нь зөв ч гэлээ алдаатай, шүүмжлэлтэй хандахаар зүйлүүд байна. Тухайлбал, Оюутнууд визээ картаа үзүүлээд өдөрт хэдэн ч удаа нийтийн тээврээр үйлчлүүлдэг байсан. Харин одоогийн шинэчлэлээр өдөрт хоёр удаа нийтийн тэээвэрт үнэгүй суух эрхтэй боллоо. Энэ хөнгөлөлт хангалтгүй байна. Учир нь оюутнууд гэр, сургууль гэсэн маршрутгүй гэдгийг шинэчлэл хийж буй нөхдүүд бодолцоогүй нь харамсалтай.
Тэд номын санд суух, дадлага, сургуулилтаа хийж буй газраа очихдоо нийтийн тээврээр явах хэрэг гардаг. Гэтэл сургуулийн номын санд байхгүй номыг төв номын сангаасаа олохоос өөр замгүй. Сургалтын төлбөр нь тэнгэрт хадаж байхад дээр нь нийтийн тээврээр зорчих эрхийг нь хязгаарлаж байгаад шүүмжлэлтэй хандах иргэд цөөнгүй байна.
Анх оюутнуудыг нийтийн тээврээр үнэгүй үйлчлүүлэх эрхийн зартаа олгохдоо зөвхөн хоёр чиглэлд явах эрхтэйгээр олгож байсан билээ. Тэгвэл өмнөх алдаатай түүхээ давтах гэж буй бололтой. Үүнийг нь оюутны холбоо, оюутнууд хүчтэй эсэргүүцсэний улмаас чиглэл хамаарахгүй эрхтэй болгосон.
Тэгвэл шинэчлэлийн улмаас оюутнууд картаа худалдаж авах бөгөөд өдөрт хоёр удаа үнэгүй суух эрхтэй болж байгаа юм байна.
-Цахим картгүй иргэд илүү мөнгө төлнө-
Одоогийн байдлаар цахим картгүй иргэд 500 төгрөгөө мөнгөний саванд хийж зорчиж байгаа билээ. Тэгвэл удахгүй цахим картгүй иргэд илүү мөнгө төлж зорчих гэнэ. Тодруулбал, цахим картаар автобусанд суухад 500 төгрөг төлдөг бол бэлэн мөнгөөр суувал 600, 800 эсвэл 1000 төгрөгийн үнэтэй байхаар хувилбаруудыг ярьж байгаа тухайгаа өчигдөр мэдэгдэв.
Харин иргэдийн хувьд цахим картыг 3600 төгрөгөөр худалдаж аваад цэнэглэх боломжгүй болохоороо бэлэн мөнгөө төлж яваа хэмээн учирлах иргэд ч байлаа. Тэгвэл илүү мөнгө төлдөг болж байгаа нь шинэчлэл хийж буй хүмүүс хэвлэж гаргасан картыг нь иргэд худалдаж авахгүй байгаа болохоор түүнийгээ борлуулах гэж ийм арга сэдлээ хэмээж байв.
Энэ талаар Нийслэлийн тээврийн газрын дарга Ч.Энхбат "Картаар 500 төгрөгөөр үйлчлүүлье гэсэн шаардлага тавьж байна. Бэлэн мөнгөөр зорчих тохиолдолд ямар ч байсан илүү мөнгө төлдөг байна. Гэхдээ тэр нь 800 төгрөг байх уу 1000 төгрөг байх уу гэдгийг эцэслэн шийдээгүй байна. Удахгүй шийдвэр гарна" гэсэн юм.
Өнөөдрийн байдлаар 100 гаруй мянган иргэд цахим картаа худалдаж авчээ. Харин ахмад настан, хөгжлийн бэрхшээлтэй иргэдэд зориулсан 60 мянга орчим картыг борлуулсан байна.
Ийнхүү цахим картгүй иргэд илүү мөнгө төлж, оюутнууд өдөрт хоёр удаа нийтийн тээвэрт үнэгүй суух болов.