Нийслэлийн хэмжээнд цэцэрлэгийн бүртгэлийг энэ сарын 25-28-ны хооронд явуулах шийдвэрийг гаргасан. Ингэхдээ БЗД-ийн оршин суугч, албан ёсны бүртгэлтэй хүүхдүүдийг цэцэрлэгт бүртгэхдээ сугалаа сугалуулж, азтай аавын хүү, ээжийн охин нь цэцэрлэгт бүртгүүлэх боломж олгосон юм. Гэвч уг шийдвэрийг БЗД-ийн эцэг эхчүүд эсэргүүцэн, 200-300-гаад эцэг эхчүүд БЗД-ийн ЗДТГ-ын хурлын зааланд цугларан эсэргүүцлээ илэрхийлж байна. Эцэг эхчүүд "Ардын хүүхдүүд сугалааны хонжвортой биш" гэхчлэн бичсэн лоозон барьсан байна.

Энэ талаар цуглаанд оролцож буй нэгэн иргэнээс тодруулахад "Хүүхдээ цэцэрлэгт бүртгүүлэх гэж 10 гаруй хоног хонон өнжин дугаарлаж байхад сугалаагаар бүртгэх шаардлага тавилаа. Гол нь БЗД-ийн хэмжээнд хэчнээн хүүхэд бүртгэх тоогоо хэлэхгүй байна. Яагаад энэ тоог хэлэхгүй байгааг гайхаж байна. Хүүхэд ямар сугалаа юм уу. Сугалаа гэхээр өөрсдийнхөө танил талыг оруулахыг ч үгүйсгэхгүй” гэлээ.

Б.Анир