Саяхан АНУ-ын Лос Анжелос хотод болсон тусгай  олимпоос Улааны Нинжбадам гэдэг охин ширээний теннисийн төрлөөр алт, мөнгөн медаль хүртжээ.  19 настай У.Нинжбадам нь УИХ-ын гишүүн, Сангийн сайд асан Ч.Улааны охин аж. УИХ-ын гишүүн Ч.Улааныг Шадар сайд болж магадгүй, Сангийн сайд болох нь гэж улстөр сонирхогчид таамаглаж байгаа. 

Монголчууд тусгай олимпоос 19 настай тамирчин алт мөнгөн медаль авсныг мэдсэн ч мэдээгүй юм шиг нүдэн балай чихэн дүлий байна. Харин энэ тухай холын Америкт бахархан мэдээлж, "Нью-Йорк таймс” сонин У.Нинжбадам охины тухай бүтэн нүүр нийтлэл бичжээ. У.Нинжбадамыг япончууд анхааралдаа авч, тэмцээнд оролцох, дасгал сургуулилт хийх бүх боломжоор хангахаа мэдэгдсэн байна. 

Манайхан Олимпийн аваргууддаа онцгой анхаарч, амжилттай оролцсон тамирчдад шагналын хур буулгаж,  сар тутам цалин тэтгэмж олгох болсон. Тэгвэл тусгай олимпийн төрөлд амжилт гаргаад ирсэн 19 настай бүсгүйд Монгол Улсын гавьяат тамирчин цол хүртээхэд нэг их хотойгоод баймааргүй л санагдана.