Хятадын зүүн бүс нутгийн Шаньдун мужид өнгөрсөн бямба гарагийн орой химийн үйлдвэр дэлбэрч есөн хүн гэмтсэн тухай BBC агентлаг мэдээллээ. Синьхуа агентлагийн хэлж буйгаар Зыбо хот дахь химийн бодис хадгалж байсан агуулахаас гал гарч, улмаар дэлбэрэлт гарсан аж. Гэхдээ тус химийн үйлдвэр орон сууцны бүсээс 1 км-ийн зайд байрладаг юм байна.

Дэлбэрэлтийн чичиргээ 2 км-ийн ойролцоо газарт мэдрэгдсэн гэж орон нутгийн иргэд ярьжээ. Хэргийн газар дээр 150 гаруй гал сөнөөгч ажиллаж, галыг бямба гарагийн шөнө унтраажээ. Шатах үедээ хорт хий ялгаруулдаг адиподинитрил хэмээх өнгөгүй шингэн бодис агуулахад байсан гэж Бээжин Таймс мэдээлсэн юм.

 Саяхан Тяньжин хотын химийн бодис хадгалж байсан агуулахад дэлбэрэлт болсны уршгаар 121 хүн амиа алдаж, 720 гаруй хүн бэртэж гэмтсэн юм. Түүнчлэн 54 хүн өнөөг хүртэл сураггүй байгаа билээ.

Ийнхүү тус улсад үйлдвэрлэлтэй холбоотой томоохон ослууд гарсаар байгаа нь эрх баригчдыг түгшээж байгаа юм. Тяньжинийн дэлбэрэлтийн дараа Хятадын Төрийн зөвлөлөөс химийн аюултай бодис, тэсрэх дэлбэрэх материал ашигладаг аж ахуйн бүх нэгжид үзлэг шалгалт явуулахаар шийдвэрлэсэн байна.