Хэрэв та Мэрилин Монрогийн амьдарч байсан байранд хэзээ нэгэн цагт орохыг хүсэж байсан бол таныг аз ивээжээ. Кино одын Нью-Йорк дахь орон байрыг нэг сарын 27.5 мянган ам.доллараар түрээслэхээр болсон байна. Тус байр нь дөрвөн унтлагын өрөө, хоёр ариун цэврийн өрөөтэй аж. Энэхүү байрыг түрээслэх тухай зарыг Town Residential хэмээх компани саяхан түгээжээ. Компанийн төлөөлөгчийн хэлснээр бол Холливудын од бүсгүйн "үнэр”-ийг тэд тус байрны шийдэлд шингээхийг ихэд хичээсэн гэжээ. 


Энэхүү Дээд Ийстсайд дахь саруулхан өрөө бүхий тохилог таунхаус нь Төв цэцэрлэгт хүрээлэнгээс хэдхэн алхмын зайтай оршдог аж. Үнэн хэрэгтээ энэхүү байр нь жүжигчин бүсгүйнх биш бөгөөд түүний жинхэнэ эзэн нь Монрогийн дотны найз гэрэл зурагчин Милтон Грин юм. Гэсэн хэдий ч Мэрилин Нью-Йоркт ирэх бүртээ тэднийд буудалладаг байжээ.