Өнөөдрөөс буюу есдүгээр сарын 1-нээс эхлэн нийтийн тээврийн хэрэгслээр бэлэн мөнгөөр зорчсон тохиолдолд 1000 төгрөг төлөх болсон талаарх мэдээлэлтэй холбоотойгоор смарт картны борлуулалт огцом нэмэгджээ.

Тухайлбал, өнгөрсөн долоо хоногт смарт картыг худалдаж авсан 240 мянган иргэн  байсан бол өнөөдрийн байдлаар нэмэгджээ. Өөрөөр хэлбэл, 280 мянган иргэн цахим картаа худалдаж авсан байна. Үүнээс болж өнгөрсөн амралтын өдрүүдээс эхлэн захын зарим хорооллуудын карт борлуулах цэгүүдэд смарт карт болоод карт цэнэглэлт дуусч иргэдийг бухимдуулжээ.

Үүнтэй холбоотойгоор картны хүрэлцээ ямар байгаа талаар "Улаанбаатар смарт карт" компанийн маркетингийн менежер Ц.Түвшинжаргалаас лавлахад "Картыг хангалттай тоогоор хэвлэсэн байгаа. Харин цэнэглэлтийн хувьд дууссан цэгүүдэд тухай бүрт нь очиж шахуу хуваарийн дагуу цэнэглэлтээ хийгээд явж байна. Өнөөдрийн байдлаар 340 карт борлуулах цэг ажиллаж байна” хэмээлээ.Тэрбээр сүүлийн өдрүүдэд смарт картны худалдаа болон цэнэглэлт нэмэгдэж байгаагаас гадна энэ долоо хоногт өмнөхөөсөө илүү нэмэгдэх хандлагатай байна гэдгийг  хэлж байлаа.