Алжаал тайлах яруу найраг: Чамд илгээлээ
Энэ удаагийн "Алжаал тайлах яруу найраг" хоромдоо яруу найрагч Д.Оюундэлгэр "Чамд илгээлээ" хэмээх шүлгийг нийтэллээ.
Чамд илгээлээ
Хойшоо нүүсэн үүлэнд
Нулимсаа шингээж явууллаа
Хонгор чам дээр минь
Хур болон бууг
Зовсон сэтгэлийн гуниг биш шүү
Зоргоор хайрын дулаахан шиврээ шүү
Зэллэн ниссэн шувуудад
Инээдээ дайгаад явууллаа
Зайдуу холын чамд минь
Итгэл болон очиг
Жаргалтайдаа биш шүү
Жамын хорвоог аргадсан сэтгэл шүү
Зүүнээс үлээх салхинд
Зүүдээ шившээд явууллаа
Зөнгөөрөө мэдэрдэг чиний
Зүүн хацар дээр үнсэг
Эрт урьдын зүггүй дурлал биш шүү
Энгэрийг чинь налж урсах эмзэгхэн шивнээ шүү
Орой дээр залрах долоон бурханд
Аминчхан хүслээ шивнэлээ
Орой бүхэн чамд минь
Адис болон очиг
Нүгэлтэйдээ биш шүү
Нүнжиг буяны цагаан тавилан шүү