Өнөөдрийн хуралдаанаар Засгийн газарт хамтран ажиллаж байсан МАН-аас томилогдсон дэд сайдуудыг чөлөөлөх асуудлыг хэлэлцэж магадгүй байна. Чөлөөлөгдсөн сайдуудын оронд Ардчилсан нам, МАХН-МҮАН-ын "Шударга ёс” эвслээс дэд сайдуудыг томилно. 


Одоогоор дэд сайдаар томилогдох хүмүүсийн нэрс тодроогүй байгаа юм. Гадуур нисч буй бор шувуугаар бол ШӨХТГ-ын дарга асан О.Магнай, "Масс” агентлагийн ТУЗ-ийн дарга Ч.Даваабаяр нарын хүмүүс дэд сайдын сэнтийд горилох тухай яриа гарч байна. 

Ямартай ч энэ долоо хоногт дэд сайдуудын асуудал олны анхаарлын төвд байх нь. Түүнчлэн МАН-аас томилогдон ажиллаж байгаа зарим яамны Төрийн нарийн бичгийн дарга нарыг өөрчлөхөөр болсноор бялуу хуваалт хавтгайрах шинжиндээ орж, гуравдугаар ээлжийнхэн суудлаа хүлээж байна. 

Өвөлжилтийн бэлтгэл, ирэх жил болох сонгууль, эдийн засгийн хямрал, төсвийн алдагдал гээд улс оронд хийх ажил, зохицуулах асуудал олон байгаа ч төр нь бүхэл бүтэн хоёр сар томилгоо болон Өршөөлийн хуулийн талаар маргалдсаар цагийг өнгөрөөж буй нь харамсалтай. Эх сурвалж www.wikimon.mn