Т.Аюурсайхан: Дугуйгаа түгжүүлж торгууль төлсөн иргэдийг хохиролгүй болгоно
Нийслэлийн иргэдийн төлөөлөгчдийн хурлын тэргүүлэгчдийн тогтоолоор зориулалтын зогсоолд машинаа тавилгүй нэгдүгээр эгнээнд машинаа байрлуулсан жолооч нарын машиныг ачих, дугуйг нь түгжих журам хэрэгжиж эхлээд багагүй хугацаа өнгөрсөн. Харин тус журмыг ШӨХТГ-аас хууль бус хэмээн үзэж "Зориулалтын дугуй түгжигч ашиглах журам”-ыг илт хүчин төгөлдөр бус захиргааны актад тооцуулахаар захиргааны хэргийн анхан шатны шүүхэд нэхэмжлэл гаргасан. Тус нэхэмжлэлийг Нийслэл дэх Захиргааны хэргийн анхан шатны шүүх энэ сарын 24-ний өдөр хянан хэлэлцэж "Зориулалтын дугуй түгжигч ашиглах журам”-ыг илт хууль бус болохыг тогтоожээ. Үүнтэй холбогдуулан ШӨХТГ иргэдийн эрх ашгийг шүүхэд нэхэмжлэн хамгаалж, хохиролгүй болгохын тулд "Шударга төрийн төлөө” ТББ болон "Монголын хуульч эмэгтэйчүүдийн холбоо” ТББ-тай хамтран ажиллах санамж бичиг байгуулж, тээврийн хэрэгслийг зөөж шилжүүлсэн болон дугуй түгжсэний улмаас хохирсон иргэдэд стратегийн өмгөөлөл үзүүлэх, нийтийн эрх ашгийг шүүхэд нэхэмжлэн хамгаалах, хохирлыг барагдуулах ажлыг зохион байгуулж байгаа аж. НИТХ-ын тэргүүлэгчдийн хууль бус шийдвэрийн дагуу өнгөрсөн хоёрдугаар сарын 28-ны өдрийн байдлаар 11746 тээврийн хэрэгслийн дугуйг түгжиж нийт 234,9 сая төгрөгний орлогыг хууль бусаар төвлөрүүлж, иргэдэд онц их хэмжээний хохирол учруулсан болохыг ШӨХТГ-ын улсын байцаагчийн дүгнэлтээр тогтоосон байдаг.
Энэ талаар ШӨХТГ-ын дарга Т.Аюурсайханаас тодрууллаа.
-Өнгөрсөн хоёрдугаар сараас хойш дугуйгаа түгжүүлж торгууль төлсөн иргэд танайд хандсан уу?
-Энэ хугацаанд иргэд маань гомдол гаргаад явж байгаа. Иргэдийн гаргаж байгаа гомдлыг бид байгууллага дээрээ нэг бүрчлэн бүртгэж байгаа. Өнөөдрийн байдлаар нийт хэдэн иргэнд хэдий хэр хэмжээний хохирол учруулсныг нь тооцоолоод иргэдээ хохиролгүй болгох ажил явуулахаар ажиллаж байгаа.
-Иргэдэд учирсан хохирлыг яаж барагдуулах вэ?
-ТББ-ууд иргэдийн эрх ашгийг шүүхэд нэхэмжлэн хамгаалж байгаа. Иргэд нэг нэгээрээ шүүхэд хандахад зардал мөнгөнөөс эхлээд хүндрэлтэй тул ШӨХТГ нь иргэдийн эрх ашгийг хамгаалахын тулд "Шударга төрийн төлөө” ТББ болон "Монголын хуульч эмэгтэйчүүдийн холбоо” ТББ-тай хамтран ажиллах санамж бичиг байгуулж, тээврийн хэрэгслийг зөөж шилжүүлсэн болон дугуй түгжсэний улмаас хохирсон иргэдэд стратегийн өмгөөлөл үзүүлэх, нийтийн эрх ашгийг шүүхэд нэхэмжлэн хамгаалах, хохирлыг барагдуулах ажлыг зохион байгуулж байгаа.
-Дээрх шийдвэрийг дугуй түгжигч компаниудад мэдэгдсэн үү?
-Дугуй түгжигч компаниудад хүргүүлж захиргааны арга хэмжээ авсан. Шүүхийн шийдвэрээр үйл ажиллагааг нь зогсоосон байгаа.
-Нийтдээ хичнээн компанид ямар захиргааны арга хэмжээ авсан бэ?
-16 аж ахуй нэгж энэ үйл ажиллагааг явуулж байгаа. Одоогийн байдлаар энэ үйл ажиллагааг маргаан шийдвэрлэх хүртэл хугацаанд түтгэлзүүлчихсэн байгаа.
-Шүүхийн шийдвэр гартал л түр зогсоосон юм уу?
-Шүүхийн шийдвэр гартал гэдэг нь эцсийн шийдвэр гартал гэсэн үг. Гэхдээ анхан шатны шүүхээс илт хууль бус актад тооцсон байгаа. Өнөөдрийн байдлаар энэ журам хүчингүй болсон гэж ойлгож болно.
-Автомашин ачиж журамлах журам бас хууль зөрчсөн гэж байсан. Энэ асуудал юу болсон бэ?
- Автомашин ачсаны улмаас иргэдэд бас хууль бус төлбөрийг ногдуулсан асуудал өмнө нь гарч байсан. Энэ хэрэг одоогоор шүүх дээр хэрэг үүсчихсэн байгаа. Ирэх сарын 9-ны 13.00 цагт анхны шүүх хуралдаан болно.
-Нийслэлийн захирагч Э.Бат-Үүл тус захирамжийг хүчингүй болгосон гэсэн?
-Нийслэлийн засаг дарга Э.Бат-Үүл хууль бус захирамжаа энэ сард өөрөө хүчингүй болгож энэ ажиллагааг зогсоохыг хүссэн. Гэвч энэ захирамж нь өөрөө анхнаасаа илт хууль бус захиргааны акт байсан. Үүнээс болоод иргэдэд онц их хэмжээний хохирол учирсан учраас энэ асуудлыг шүүх дээр хэлэлцэх нь зүйтэй гэсэн байр сууриа хамгаалж байгаа.
Т.Болормаа
Сэтгэгдэл байхгүй байна.