Сургалтын төв байгуулах нэрийдлээр хотын А зэрэглэлийн бүст газар авч өндөр байшин барьсан нь бизнесийн зорилготой байсан нь тодорхой болсон С.Эрдэнэ сайдын тухай сэтгүүлч Л.Болормаагийн ээлжит нийтлэл news.mn сайтад гарав. Өмнөх нийтлэлийн тухайд "Хүүхдийн нэр барьж ганц ч газар аваагүй” хэмээх тайлбарыг Фэйсбүүк хуудсаараа дамжуулан өгсөн сайд энэ удаа тэрхүү тайлбараа яг хэвээр нь давтжээ. Харин Л.Болормаагийн нийтлэлд сэтгэгдэл бичсэн хүмүүсийн дийлэнх нь сэтгүүлчийг дэмжиж байгаагаа илэрхийлсэн төдийгүй С.Эрдэнийн зарим хуудуутай үйлдлийн талаар дурьдсан нь анхаарал татаж байна. Тухайлбал нэг уншигч бичихдээ "Эрдэнэ настайчуудыг "Их Тамир” ахмадын амралтандаа 2-5 хоног үнэгүй амруулдаг. Нууц нь юу гэхээр 12 хоног амруулсан гэж нийгмийн халамжийн мөнгийг нь хусдаг юм. Хятадаас сонсголын аппарат авчраад настайчуудад 35 мянгаар өгдөг. Нууц нь юу вэ гэхээр 10 мянгаар Хятадаас бөөнөөр авчраад 700 мянгаар улсаар үнэлүүлээд настайчуудыг харж үзэж байгаа маягаар сонсгол сайн муу нь хамаагүй хямд өгч байна, бусдыг нь улс буюу Эрдэнэ дааж байна гэж шахдаг. Нэг аппаратаас 690 мянган төгрөг хусаад дээр нь буянтай хүн гэж магтуулдаг” хэмээн бичжээ.

Хүүхдийн паркийн ард баригдсан "Шонхор тауэр” болон түүний эзэмшлийн бусад барилгын тухай баримт түшиж бичсэн Л.Болормаагийн нийтлэлийн хариуд С.Эрдэнэ сайд Фэйсбүүк хуудсаараа доорх тайлбарыг өгсөн билээ. "Энэ асуудалд тайлбар хийх нь зүйтэй болов уу гэж бодлоо. "Шонхор тауэр”-ийн газрыг "Хөгжлийн бэрхшээлтэй хүүхдийн үндэсний хөгжлийн төв” барих нэрийдлээр намайг авсан гэсэн утга бүхий нийтлэл, мэдээлэл хэвлэлээр удаа дараа гарчээ. Ингэж хардах болсон үндэслэлийг харвал "Төгс Эрдэм сан” ТББ-ын үйл ажиллагааны чиглэлүүд дотор "Хөгжлийн бэрхшээлтэй хүүхдүүдэд туслах” гэсэн чиглэл байдагтай холбож бичсэн бололтой юм.

Тийм ээ, энэ санг миний охин удирдаж ажиллуулдаг, тус сан олон чиглэлээр үйл ажиллагаа явуулдгийн нэг нь хөгжлийн бэрхшээлтэй хүүхдүүдэд туслах юм. Энэ чиглэлээр багагүй ажил хийж, түмэн олондоо тус хүргэж явааг нь хараад эцэг хүний хувьд охиноороо бахархаж явдаг. Гэхдээ миний охин ч тэр, би ч тэр хөгжлийн бэрхшээлтэй хүүхдүүдийн нэр барьж газар авсан удаагүй гэдгээ хариуцлагатайгаар хэлье. Уг нийтлэлд дурдагдсан "Шонхор тауэр”-ийн газар, ер нь Монгол Улсын хаанаас ч нэг сөөм ч газар хүүхдийн нэр барьж аваагүй гэдгийг хариуцлагатайгаар мэдэгдэж байна.

"Шонхор тауэр”-ийн газрыг "Төгс Эрдэм сан” цэвэр өөрийн үйл ажиллагааны зориулалтаар авсан бөгөөд надтай ямар нэгэн хамааралгүй гэдгийг нэмж тодотгох нь зөв болов уу. Энэ дашрамд хэлэхэд, "Хөгжлийн бэрхшээлтэй хүүхдийн үндэсний хөгжлийн төв”-ийг БНХАУ-ын хөрөнгө оруулалтаар барих бөгөөд манай яамны зүгээс Баянгол дүүргийн XX хорооны нутаг дэвсгэрт газрын болон дэд бүтцийн асуудлыг эхний ээлжинд шийдэж өгөөд байна. Энэхүү төв нь нийт 60 орчим тэрбум төгрөгийн өртөгөөр босох юм. Хөрөнгө оруулагч талын зүгээс барилгын зураг төслөө хийж бэлэн болгосон ба энэ сард шавыг нь тавьж, 2016 оны хавраас эхлэн барилгын ажлаа эхлүүлэхээр болсноо мэдэгдээд байгаа билээ. Л.Болормаа сэтгүүлч таны санал болгосны дагуу энэ талаар болон сүүлийн үед Хүн амын хөгжил, нийгмийн хамгааллын салбарын талаар гарч байгаа зарим сөрөг, ташаа мэдээлэлд тайлбар өгөхөд бэлэн байна”.