Өвөр Монголын Бугат хотын Дархан муумянган холбоот хошуунд Чингис хааны дүү Хавт Хасарын тахилгын ёслол өнгөрсөн долоо хоногт болов. Энэ тахилгын ёслолыг Хубилай хаан ширээнд сууснаас хойш уг хошуунд жил бүр хийж ирсэн уламжлалтай байсан нь Хятадын Соёлын хувьсгалын үед тасалджээ. 1988 онд өвөрмонголчууд Бугатын Хар шороон уул, Цагаан шороон уул хоёрын дунд Хавт Хасарын тахилгын гэр хэмээх багавтар байгууламжийг барьсан бөгөөд энэ нь есөн метр өндөр, 90 кв/м талбай бүхий монгол гэрийн хэлбэртэй юм. Улмаар Дархан муумянган хошуу нь тахилгын гэрийг өргөжүүлэхэд ихээхэн хөрөнгө оруулахаас гадна тахилгын ёслолыг судлах, дэмжихэд мэргэжлийн хүмүүсийг олноор татан оролцуулах болжээ. Хасар судлалын төвийн захирлын хэлж буйгаар, өөрсдийгөө Хасарын үр сад хэмээн үздэг олон зуун хүн ӨМӨЗО-ноос гадна Хөхнуур, Жилин, Хармөрөн муж болон Шинжаанаас жил бүр ирж энэ тахилгад оролцдог байна. 2007 онд хятадууд Хасарын тахилгын ёслолыг Өвөр Монголын соёлын халдашгүй өвийн жагсаалтад оруулсан бол 2013 онд Хятадын Ардын урлаг утга зохиолын нийгэмлэгээс Дархан муумянган холбоот хошуу "Хасарын тайлга тахилгын ёслолын голомт” хэмээн бүртгэжээ.

 Л.Бат