Ким Чен Уны дэглэмтэй хамтран ажилладаг Сингапурт төвтэй "Choson Exchange”  төрийн бус байгууллагын захирал Эндри Абрахамян Хойд Солонгосын баруун эргийн Нампо хотод буй нэгэн үйлдвэрт автомашин үйлдвэрлэж байгаа тухай Барууны хэвлэлд ярьжээ. Мүүний шашныг үндэслэгч Сан Мён Мүүний 1999 онд Хойд Солонгосын төрийн мэдлийн "Рёнбон” корпорацитай хамтран байгуулсан байгуулсан "Пёнва моторз” хэмээх энэ компани Италийн "Fiat”, Германы "Mercedes-Benz” Хятадын "Shuguang” компаниудын лицензээр бага оврын ачааны болон суудлын жижиг тэрэг үйлдвэрлэдэг байна. Гэхдээ тэдгээрийн моторын хүчин чадал нь 80 морины хүчээс хэтэрдэггүй бөгөөд харьцуулахад Америкт хамгийн их борлогддог "Toyota Camry” суудлын тэрэг 178 морины хүчтэй юм. Борлуулалт, ашиг орлого тааруу байсны улмаас Сан Мён Мүүний гэр бүлийнхэн уг бизнесээ Хойд Солонгосын талд хоёр жилийн өмнө бүрэн шилжүүлсэн гэнэ.

Үүнээс хойш уг компанийн тухай албан ёсны мэдээллийг Пхеньян бараг цацахаа больсноос гадна гадаадын иргэд уг үйлдвэрт очих боломжгүй болсон байна. Э.Абрахамяны олж мэдсэнээр тус үйлдвэр өнгөрсөн жил 1600 ширхэг машин үйлдвэрлэсэн гэнэ.