"Түрээсийн орон сууц” хөтөлбөрийг хэрэгжүүлэх зарим арга хэмжээний тухай Засгийн газрын тогтоол энэ сарын 12-нд батлагдсан. Тус тогтоолоор "Төрийн орон сууцны корпораци” ТӨҮГ-ын захиалгаар Хот болон хөдөө орон нутагт захиалж бариулсан орон сууцнаас 929 орон сууцыг төрийн түрээсийн орон сууцны санд шилжүүлэхээр болсон. Улаанбаатар хотод баригдсан 350 орон сууц, Архангай, Увс, Дархан-Уул, Хэнтий, Ховд аймгийн төвүүд, Сэлэнгэ аймгийн Зүүнхараа, Хэнтий аймгийн Бор-Өндөрт баригдсан 579 орон сууцыг төрийн өмчийн түрээсийн орон сууцны санд шилжүүлнэ. Түрээсийн нэг сарын төлбөрийг орон сууцны нийт талбайн хэмжээ, өрөөний тооноос хамааруулан нийслэлд 200-280 мянган төгрөг, орон нутагт 140-230 мянган төгрөг байхаар тогтоогоод байна. Өнгөрсөн онд орон нутагт 800, Улаанбаатарт 1,620 нийтдээ 2,000 гаруй айлын орон сууцыг захиалж ашиглалтад оруулсан. Эдгээрээс зургаан аймагт нийтдээ 579 орон сууц, Улаанбаатарт "Буянт-Ухаа-2”хорооллын 350 орон сууц нийт 929 орон сууцыг төрийн түрээсийн санд шилжүүлж авахаар болжээ. Тус хөтөлбөр урьдчилгаа төлбөрөө цуглуулж чадаагүй, банкны зээлийн шаардлага хангадаггүй, зээлд хамрагдах боломжгүй ахмад настан болон зорилтот бүлгийн иргэдийг тохь тухтай орчин үеийн шаардлага хангасан, инженерийн дэд бүтэцтэй орон сууцанд амьдрах боломжийг олгох зорилгоор хэрэгжих гэж байгаагаараа онцлогтой юм. Түрээсийн нэг сарын төлбөрийг Улаанбаатарт нэг байрны үнийг сарын 200-280 мянга орон нутагт 130 мянган төгрөг гэж тусгажээ. Үнэ өрөөний тооноос хамаарахгүй бөгөөд нэг өрөө байр 34,60 мкв-тай байж болно. Хоёр өрөө байранд ч ялгаагүй мкв-т суурилж сарын жишиг үнийг тооцож тогтоох аж. Харин хөдөө орон нутагт мкв-ын үнийг 4,500, Улаанбаатарт 6,500 төгрөгөөр тооцож дээд хязгаарыг өрхийн орлогын 25 хувиас хэтрэхгүй байхаар тооцсон аж.

Т.Болормаа