Аргентины Ерөнхийлөгчийн оффшор дансны асуудлыг өргөжүүлэн шалгана
Аргентины шүүгч Себастиан Касанельо тус улсын төрийн тэргүүн Маурисио Макригийн оффшор компаниудтай холбоотой асуудлыг судлах ажлын хүрээнд дахин таван фирмийн мэдээллийг гаргаж өгөхийг хүсчээ.
Эх сурвалжийн мэдээлснээр шүүгч Аргентины Хууль зүйн яамны ерөнхий шалгалтын газарт "Grufarma”, "SOCMA Americana”, "Global Collection Services”, "MTC Investment”, "Macri Investment Group” зэрэг компанийн үйл ажиллагааны тухай мэдээллийн хуулбарыг олж өгөхийг үүрэгдсэн байна. Эдгээр компанийг төрийн тэргүүнтэй холбоотой байж магадгүй гэж үзжээ. Компаниудын баримт нь 1985-2007 оны үйл ажиллагааг хамарч байгаа юм байна.
Үүнээс гадна шүүгч Хууль зүйн яамны Санхүүгийн мэдээллийн хэлтэст "Fleg Trading Ltd”, "Kagemusha SA” компаниудын тухай мэдээллийг олж өгөхийг шаарджээ. Эдгээр компанийг Уругвай, Их Британи, Панам, Багамын арлуудад сэжигтэй ажиллагаа явуулсан эсэхийг тогтоох зорилготой байгаа гэнэ. Аргентины прокурорын газраас өнгөрсөн дөрөвдүгээр сард оффшорт бүртгэлтэй компаниудтай холбоотой мэдээллээр зориудаар нуун дарагдуулсан байж болзошгүй Макритай холбогдуулан мөрдлөг, шалгалт явуулахыг шүүхээс хүсчээ. Панамын баримтуудад гарсан мэдээллээс үзэхэд Аргентины Ерөнхийлөгч 1998 онд Багамын арлуудад эцэг Франко Макригийн байгуулсан "Fleg Trading Ltd” компанийн захирал байсан байж болзошгүй бөгөөд хожим нь Панамд бүртгэлтэй "Kagemusha SA” фирмд яг ийм албан тушаал хашиж байсан байж магадгүй аж. Гэвч Макригийн хөрөнгө орлогын мэдүүлэгт эдгээр компанийн талаар огт дурдаагүй байдаг гэнэ. Ерөнхийлөгч Маурисио Макри өөрийг нь хууль зөрчсөн гэж байгааг эрс няцааж, эдгээр баримтыг нягталж шалгах хүсэлт тавьжээ.
Вашингтон хотноо төвтэй Олон улсын эрэн сурвалжлах сэтгүүлчдийн консорциумаас 2016 оны дөрөвдүгээр сарын 3-нд улс орнуудын төрийн өнөөгийн болон өмнөх удирдагчидтай холбоотой оффшор дансны тухай мэдээлэл бүхий 11.5 мянган баримтыг дэлгэсэн юм. Энд Панамын "Mossack Fonseca” компанийн задарсан мэдээллүүд л багтсан байна. Гэхдээ компанийн бүтэн архив задраагүйг тэмдэглэх хэрэгтэй.
Эх сурвалж:
Сэтгэгдэл байхгүй байна.