Сирийн зүүн нутагт "Лалын улс” босогчдын цэрэгжсэн бүлэглэлийг онилсон агаарын цохилтод олон энгийн номхон иргэн, тэдний дотор хүүхдүүд амь үрэгджээ.

 

Их Британид төвтэй "Сирийн хүний эрхийг ажиглагч” ТББ мэдэгдэхдээ "Орос болон Сирийн цэргийн нисэх онгоц бямба гарагт агаараас цохилт өгсөн” гэв.

Сирийн Дейр аль-Зор мужийн Куран хотод босогчдын байршилд агаараас цохилт өгсөн гэсэн мэдээлэл байна.

Тус ТББ-ын мэдэгдсэнээр, 47 хүн агаарын цохилтод өртөн амь үрэгдсэний 31 нь нутгийн оршин суугчид, тэдний дотор хүүхдүүд аж.

Орос болон Сирийн засгийн газрын хүчнийхэн "Лалын улс” бүлэглэлд агаараас цохилт өгөх ажиллагаа явуулсаар байгаа юм. АНУ тэргүүтэй эвслийн хүчнийхэн мөн Сири дэх босогчидтой тэмцэж байгаа билээ.

"Лалын улс” бүлэглэлийнхэн энгийн номхон иргэд амьдардаг бүсүүдэд хоргодож байгаагийн улмаас иргэд амь үрэгдэх нь нэмэгдсээр байна.